زمری کامګار

زمری کامگار، د هېواد نامتو سوداګر او د افغانستان کرکټ بورډ غړی، د ۱۹۵۴م کال د اکتوبر په دویمه نېټه د بلخ ولایت په مزارشریف ښار کې زیږیدلی دی. نوموړی په یوه شتمنه کورنۍ کې لوی شوی او د بلخ پوهنتون د تخنیکي انجنیرۍ پوهنځي څخه د لسانس سند لري. همداراز، د کابل پوهنتون څخه یې د نفتو او ګازو انجنیرۍ دوره په بریالیتوب سره بشپړه کړې ده او په دری، پښتو، انګلیسي او روسي ژبو روانې خبرې کولی شي.

د زمری کامگار د کورنۍ سوداګریز ژوند هغه وخت پیل شو، کله چې د دوی نیکه په ۱۹۱۹م کال د افغانستان له بریتانیوي استعمار څخه د خپلواکۍ وروسته، د غازي امان‌ الله خان حکومت له مشرانو سره بیعت وکړ. دوی خپل تجارت د نفتو، غوړو، خوراکي توکو، تخنیکي تجهیزاتو او ساختماني موادو د وارداتو او صادراتو له لارې د ګاونډیو هېوادونو او پخواني شوروي اتحاد سره پیل کړ.

ښاغلي کامگار له سوداګرۍ څخه موخه د خپل ملت خدمت، د عادلانه کاروبار له لارې د کار زمینه برابرول او د خپلې مورنۍ خاورې اقتصادي پرمختګ ګڼلی دی. نوموړي د "کام ګروپ" تر چتر لاندې یو بریالی سوداګریز بنسټ جوړ کړ چې اوس د افغانستان په کچه دریم ستر سوداګریز ګروپ ګڼل کېږي. کام ګروپ په بېلابېلو برخو لکه: نفت، هوايي چلند (مسافر وړونکي او بار وړونکي)، تفریحي سکتور (تلویزیون او راډیو)، خیریه، سوداګرۍ (واردات او صادرات) او انرژي کې فعاله ونډه لري.

کام ایر د افغانستان لومړنی خصوصي هوایي شرکت دی، چې د هیواد د هوايي ترانسپورت د پراختیا بنسټ یې کېښود. دا شرکت د ښاغلي کامگار په مشرۍ رامنځته شو او نن د افغان هوايي چلند په صنعت کې د اعتبار نښه ده. کام ایر نه یوازې ملي الوتنې ترسره کوي، بلکې له افغانستان څخه ازبکستان، تاجکستان، ترکیه، هند، ایران او متحده عربي اماراتو ته هم منظم نړیوال پروازونه لري او د افغانستان لپاره یې له نړۍ سره د باور وړ پل جوړ کړی دی.

زمری کامگار ویاړي چې د افغانستان د ملي کرکټ لوبډلې د خدمت فرصت یې تر لاسه کړی دی. نوموړی باور لري چې ملي لوبډله د هېواد د ځوان نسل لپاره الهام بخښونکی قوت دی او د افغانانو ترمنځ د یووالي او تفاهم فضا رامنځته کوي. کامگار ټینګار کوي چې باید د افغانستان د کرکټ بورډ او ملي لوبډلې لپاره پرلپسې سوداګریز فرصتونه برابر شي، ترڅو مالي وضعیت یې لا ښه شي او دا لوبه په ټولو ولایتونو کې لا زیاته پراخه شي. د نوموړي په اند، کرکټ د ملتونو ترمنځ د نږدېوالي سبب شوی او د افغانستان د منفي فضاوو په له منځه وړلو کې یې رغنده رول لوبولی دی.