سردار ولي شیرزاد

سردارولي شېرزاد، د افغانستان کرکټ بورډ د تدارکاتو مدیر

سردارولي شېرزاد د افغانستان کرکټ بورډ د تدارکاتو څانګې مدیر دی چې د ۱۹۸۳م کال د اپرېل میاشتې په دریمه نېټه د ننګرهار ولایت په شیرزادو ولسوالۍ کې زېږېدلی دی. نوموړي په اداره او سوداګرۍ څانګه کې د لېسانس سند لري او د تدارکاتو په برخه کې ۱۷ کلنه تجربه لري.

نوموړی د ۲۰۲۰م کال په اکټوبر میاشت کې د افغانستان کرکټ بورډ د تدارکاتو د مدیر په توګه خپله دنده پیل کړه. د نوموړي لپاره دغه دنده یوازې مسلکي مسوولیت نه دی، بلکې د کرکټ لوبې د بنسټیز پرمختګ لپاره د خپلې شخصي انګېزې او ژمنتیا له اړخه هم ډېر اهمیت ورته لري چې په خورا لېوالتیا سره خپلې دندې ته دوام ورکوي.

د نوموړي په مدیریت کې د افغانستان کرکټ بورډ د تدارکاتو څانګې بېلابېلې سترې پروژې په بریالۍ توګه بشپړې کړې دي. په دغو پروژو کې په بلخ، بدخشان، تخار او پکتیکا ولایتونو کې د کرکټ روزنځایونو رغونه او دغه راز د ننګرهار ولایت د غازي امان الله خان کرکټ لوبغالي او دغه راز د خوست ولایت د رحمت ولي مسرور کرکټ لوبغالي بیا رغونه شامله ده.

ښاغلی شېرزاد باور لري چې د افغانستان کرکټ بورډ کاري ماحول بشپړه مسلکي بڼه لري او کارکوونکو ته د غوره کار او غوره پایلو ترلاسه کولو الهام ورکوي. نوموړی په خپلو دندو کې د تخنیکي زده کړو د ترلاسه کولو فرصت هم موندلی، چې دا خپله د بورډ د مسلکي فضا څرګندونه کوي او د کارکوونکو د رضایت کچه لوړه ساتي.