عبدالولي امین

عبدالولي امین، د افغانستان کرکټ بورډ د ظرفیت لوړونې څانګې امر

 محترم عبدالولي امین د ۱۹۷۵م کال د جون میاشتې په ۱۱مه نېټه د کندهار ولایت په ډنډ ولسوالۍ کې زېږېدلی دی. نوموړی د افغانستان د کرکټ د پرمختګ او پراختیا له مهمو څېرو څخه شمېرل کېږي، چې دا مهال د افغانستان کرکټ بورډ د ظرفیت لوړونې څانګې د امر په توګه دنده ترسره کوي.

ښاغلی امین د سیاسي علومو په برخه کې د کابل د جهان پوهنتون څخه د لېسانس سند لري. نوموړي له افغانستان کرکټ بورډ سره له ۱۵ کلونو څخه زیاته کاري تجربه لري او له دې سربېره یې له ملګرو ملتونو هایبیټات ادارې او نورو ملي او نړیوالو بنسټونو سره هم شاوخوا ۱۲ کاله مسلکي تجربې لري.

عبدالولي امین له کرکټ سره خپل سفر د لوبغاړي په توګه پیل کړ. نوموړي د ۱۹۹۶م کال په لومړي ځل لپاره په ولایتي کرکټ سیالیو برخه واخیسته، چې په کابل کې ترسره شوې وې. ښاغلي امین تر ۲۰۰۹م کاله پورې د کرکټ لوبغاړی پاتې شو، خو وروسته یې د روزنې لوري ته مخه کړه څو د ځوانو افغان لوبغاړو د روزنې او د هغوی د پرمختګ لپاره کار وکړي.

نوموړی د روزنې په برخه کې پراخه تجربه لري او ګڼې لاسته راوړنې لري. د روزونکي په توګه د نوموړي په سترو لاسته راوړنو کې لاندې بریاوې شامل دي:

-        په ټایلنډ هېواد کې د افغانستان د ۱۶ کلنو لوبډله اتلولۍ ته رسول

-        د افغانستان ملي لوبډلې پر وړاندې د یو ورځنیو سیالیو په لوبلړۍ کې ۳-۰ بریا ته رسول

-        افغان نوولس کلنه لوبډله د بنګله ‌دېش پر وړاندې تاریخي بریا ته رسول، چې له مخې یې افغان نوولس کلنه لوبډله لومړۍ دویمه درجه لوبډله شوه چې د یوې بشپړ غړیتوب لرونکې لوبډلې پر وړاندې بریا ترلاسه کوي.

-        په ۲۰۱۲م کال نوولس کلنو نړیوال جام سیالیو کې د ۱۶ لوبډلو له منځه افغان لوبډله ۱۰م مقام ته رسول

 سربېره پر دې، نوموړي د لوبغاړو د غوراوي کمېټې د غړي په توګه هم مهم رول ادا کړی دی. د هغه په کاري موده کې د لوبغاړو د غوراوي لپاره عمومي تکلاره جوړه شوه، افغان نوولس کلنو د اسیا جام اتلولي وګټله او په نړیوال جام کې نیمه پایلوبو ته ورسیده، چې له هماغې لوبډلې څخه ډېر لوبغاړي ملي لوبډلې ته پورته شول او اوسمهال د هېواد لپاره په نړیوال کرکټ کې سترې لاسته راوړنې لري.

ښاغلي امین په افغانستان کرکټ بورډ کې ګڼ شمېر دندې ترسره کړې دي، نوموړي د بست زون د مشر په توګه خپله دنده پیل کړه چې ورپسې د نوولس کلنې لوبډلې مشر روزونکی وټاکل شو. له دې وروسته نوموړي د لوبغاړو د غوراوي کمېټې د غړي، د ملي لوبډلې د مدیر، د کورني کرکټ امر، د عملیاتي برخې امر، د نظم او ډېسپلین کمېټې د غړي، مرستیال کرکټ ډایرکټر او دغه راز د ظرفیت لوړونې څانګې د امر په توګه یې دندې ترسره کړې دي. ښاغلی عبدالولي امین د روزنې دریمه درجه سند هم لري او همداراز یې د کرکټ نړیوالې شورا د روزونکو د ښوونې دویمه درجه سند هم ترلاسه کړی دی.

ښاغلی امین ویاړي چې د افغانستان د کرکټ د ویاړلي سفر برخه دی او باور لري چې که څه هم د افغانستان د کرکټ تاریخ لنډ دی، خو پرمختګ یې له ګڼو نورو هېوادونو سره د مقایسې وړ نه دی. نوموړی ټینګار کوي چې د استعداد موندنه، روزنه او پیاوړتیا د افغان کرکټ د تلپاتې ودې لپاره اړینه ده.

د نوموړي په باور د شته لاسته راوړنو د ساتلو او لا ښه کولو لپاره باید لا زیات کار وشي او په دوامداره ډول ټینګار کوي چې باید د کورني کرکټ پراختیا ته پانګونه وشي ترڅو افغانستان د راتلونکې لپاره پیاوړې او مسلکي لوبډلې ولري.