ممتاز عمرزی

ممتاز عمرزی – د افغانستان کرکټ بورډ د انجینرۍ څانګې امر

ممتاز عمرزی د افغانستان کرکټ بورډ د انجینرۍ څانګې امر دی چې د ۱۹۸۰م کال د اپرېل میاشتې په ۱۸مه نېټه په میدان وردګ ولایت کې زېږېدلی دی. ښاغلي عمرزي د کابل پوهنتون د سیول انجینرۍ له پوهنځي څخه د لېسانس سند ترلاسه کړی او له بېلابېلو ادارو سره له شلو کلونو زیاته کاري تجربه لري.

د څانګې د امر په توګه، ښاغلی عمرزی د کرکټ بورډ د رغنیزو پروژو د پلان جوړونې، ډیزاین، لګښت اټکل، تطبیق، څارنې، ارزونې او ګټې سپارنې مسؤلیت پر غاړه لري. نوموړی همدارنګه د ویکټو او ویشتنځایونو د جوړولو او رغولو، د چمن د کرلو او ساتنې، د لوبغالو او اکاډمیو څخه د عایداتو د تولید، او د ټولو لوبغالو او روزنځایونو د کارکوونکو، لکه کیوریټرانو (ویشتنځای جوړونکو) او د اکاډمۍ د کارکوونکو د مدیریت مسؤلیت هم لري.

د نوموړي تر مشرۍ لاندې، انجینرۍ څانګې په بېلابېلو ولایتونو کې مهمې رغنیزې پروژې په بریالیتوب پلې کړې دي. د هغه له مهمو لاسته راوړنو څخه د نجیب ‌الله تره‌ کي کرکټ لوبغالي جوړول، په کابل کرکټ لوبغالي کې د لوبغاړو د تکړښت او درملنې مرکزونو بیارغونه، د لغمان کرکټ لوبغالي رغول، د کندهار کرکټ اکاډمۍ جوړول، د پکتیکا د کرکټ لوبغالي دویم پړاو بشپړول، او همدارنګه په لوګر، میدان وردګو، هلمند او بلخ ولایتونو کې د لوبغالو جوړول یادولی شو. دغه راز په خوست، غزني او پکتیا ولایتونو کې د کرکټ اکاډمیو رغونه او د خوست ولایت د رحمت ولي مسرور کرکټ لوبغالي پراختیا د نوموړي د هڅو او مدیریت ښکاره بېلګې دي.

ممتاز عمرزی په هېواد کې د کرکټ د زیربناوو په جوړولو او پیاوړتیا کې حیاتي رول لوبولی دی. د هغه هڅې یوازې د لوبغالو او تاسیساتو په رغونه او بیارغونه پورې نه دي محدودې، بلکې د زرګونو ځوانو لوبغاړو لپاره یې د لوبو او روزنې لپاره د اړینو اسانتیاو په برابرولو کې رغنده رول هم لوبولی دي، چې په هېواد کې د کرکټ د ودې او راتلونکي د پیاوړتیا لپاره مهمې دي.

ښاغلی عمرزی په کرکټ بورډ کې خپله دنده یوه د ویاړ او لاسته راوړنو ډکه تجربه ګڼي. نوموړی په دې باور دی چې د افغانستان کرکټ بورډ مسلکي او هڅوونکی کاري چاپېریال لري، چې کارکوونکو ته د ودې، د خپلو وړتیاوو د څرګندولو او د نوو تجربو د ترلاسه کولو فرصتونه برابروي. د هغه په اند، د کرکټ بورډ کارکوونکي نه یوازې نوي مهارتونه او نړیواله تجربه ترلاسه کوي، بلکې په هېواد کې د کرکټ د پرمختګ او وده کې هم د پام وړ ونډه اخلي.