د افغانستان کرکټ بورډ د کورني کرکټ له کلني مهالوېش سره سم د راتلونکې اپرېل میاشتې په پنځمه نېټه د زونونو په کچه پنځم پړاو میرویس نیکه درې ورځنۍ سیالۍ پیلېږي. دغه سیالۍ به د یادې میاشتې تر ۲۳مې نېټې د ننګرهار ولایت په دوه بېلابېلو کرکټ لوبغالو کې د پنځه زونونو د منتخبو لوبډلو ترمنځ دوام ومومي.
په دې سیالیو
کې به مس عینک، بند امیر، بست، سپین غر او امو زونونو لوبډلې ګډون ولري. هره
لوبډله به په لومړي پړاو کې څلور سیالۍ ترسره کړي، چې د ۱۹ ورځو په موده کې به یې ترمنځ ټولې ۱۰ لوبې وشي. دا لوبې به د ننګرهار ولایت په غازي امان الله خان او شهید نجیب الله ترهکي کرکټ لوبغالو کې ترسره شي.
د دغو سیالیو
په ترڅ کې به د ۵ زونونو په ګټه د کورني کرکټ قرارداد لرونکي لوبغاړي او په روان کال کې د تېرو لومړۍ او
دویمه درجه ولایتي سیالیو ځلېدلي لوبغاړي ولوبېږي.
د یادونې وړ
ده چې د زونونو په کچه د میرویس نیکه درې ورځنیو سیالیو له پای ته رسېدو وروسته به د زونونو په کچه څلور ورځنۍ (فرسټ کلاس) سیالۍ هم ترسره شي، چې پکې
به د بېلابېلو ملي لوبډلو ګڼ شمېر لوبغاړو ترڅنګ د کورني کرکټ مخکښ لوبغاړي هم ګډون ولري.
