کابل: افغانستان کرکټ بورډ د ایرلنډ کرکټ ملي لوبډلې پخوانی الرونډر جان موني د افغان اتلانو د ډګرساتنې د نوي روزونکي او دغه راز استرالیایی نیرملان تنابالزینګم د ملي لوبډلې د نوي فیزیوتراپېسټ یا ډاکټر په توګه وګماره. دواړه روزونکي اوسمهال د روان تمریناتي کمپ لپاره لوبډلې سره یو ځای شوي دي او راتلونکو نړیوالو سیالیو لپاره به هم د ملي لوبدلې سره مل وي.
جان موني د
ایرلنډ کرکټ ملي لوبډلې په ګټه ۹۱ نړیوالې سیالۍ ترسره کړې او د یو ورځنیو نړیوالو
سیالیو په درې نړیوالو جامونو او دغه راز د شل اوریزو سیالیو په دوو نړیوالو
جامونو کې د یاد هېواد په ګټه لوبېدلی دی. سربېره پر دې، نوموړي له انګلستان کرکټ
بورډ لخوا د روزنې درې واړه (دریمه، دویمه او لومړۍ درجه) کورسونه په بریالیتوب سره
بشپړ کړي دي.
جان موني له دې
وړاندې په ۲۰۱۸ – ۲۰۱۹ کلونو کې هم د افغانستان کرکټ ملي لوبډلې د ډګرساتنې د
روزونکي په توګه دنده ترسره کړې ده. د دې ترڅنګ نوموړي په ۲۰۱۹م کال کې د ویسټ
انډیز ملي لوبډلې د ډګرساتنې روزونګی هم پاتې شوی دی.
له بلې خوا
نیرملان تنابالازینګم خورا پیاوړې تحصیلي او مسلکي مخینه لري. نوموړي په ۲۰۱۰ز کال
کې د استرالیا له سیډني پوهنتون څخه د فیزیوتراپۍ په برخه کې د ماسترۍ او په ۲۰۰۸م
کال کې له همدې پوهنتون څخه د ورزشي او فزیکي تمریناتو په برخه کې د لېسانس سند
ترلاسه کړی دی. نوموړی دغه راز د استرالیا د فزیوتراپۍ ادارې او د استرالیا فزیوتراپۍ
ټولنې فعال غړی هم دی.
تنابالازینګم
له ۲۰۱۸ز کال راهیسې د کنکورد ورزشي درملو مرکز کې د ارشد فیزیوتراپیست په توګه
کار کوي او له ۲۰۲۰ز کال راهیسې د متحده عربي اماراتو په نړیوال شل اوریز لیګ کې د
ډیزرټ وایپرز لوبډلې د فیزیوتراپیست په توګه دنده ترسره کوي. نوموړی د ۲۰۱۷ز د
مارچ څخه تر ۲۰۱۸ز کال تر جون میاشتې پورې د سریلانکا د کرکټ بورډ د ظرفیت لوړونې
او طبي څانګې مشر پاتې شوی دی.
نیرملن د خپل
مسلکي ژوند په اوږدو کې له ګڼو ملي او نړیوالو لوبډلو او ورزشي ادارو سره کار کړی
دی چې پکې د استرالیا د نیو ساوت ویلز کرکټ اداره، د بنګله دېش غوره لیګ رنګپور
رایډرز لوبډله، د کاناډا د غوره لیګ مونتریال ټایګرز لوبډله، د کرکټ نړیوالې شورا
غوره لوبډله او دغه راز د بیګ باش سیالیو د سېډني تندرز لوبډله شاملېږي.
د یادونې وړ ده
چې افغان اتلان اوسمهال په متحده عربي اماراتو کې د پاکستان او اماراتو پر وړاندې
د درې اړخیزې لوبلړۍ او دغه راز د ۲۰۲۵م کال اسیا جام سیالیو لپاره د بشپړ
چمتووالي په موخه په تمریناتو بوخت دي.
-پای-