افغان ابدالیان کرکټ لوبډلې نن د اکسپلور افغانستان درې اړخیزې لوبلړۍ په لړ کې د ایرلنډ الف لوبډلې ته د ۷ ویکټو په توپیر ماتې ورکړه او په یادو سیالیو کې یې خپله لومړۍ بریا خپله کړه.
افغان لوبډلې د
دغې لوبې پچه وګټله او لومړی یې په خپله د توپ اچونې پرېکړه وکړه. افغان توپ
اچوونکو دغه پرېکړه ډېره ښه ثابته کړه او د یوې توپ اچونې پرمټ یې سیاله لوبډله په
۲۰۳ منډو له ډګره بهر کړه. د افغان
لوبډلې په ګټه قیس احمد ۳، فرمان الله ساپي او شرف الدین اشرف ۲-۲،
عبدالمالک، نوید ځدراڼ او خلیل احمد یوه-یوه ویکټ ترلاسه کړه.
افغان توپوهونکو د یاد هدف په تعقیب کې ډېره ښه
توپوهنه هم وکړه او دغه هدف یې یوازې په ۳۳.۱ اورونو کې د خپلو درې لوبغاړو په
زیان سره ترلاسه کړ. د افغان لوبډلې په ګته زبید الله اکبري ۷۶، صدیق الله اتل ۵۲،
دروېش رسولي ۳۳* او اکرام علي خېل ۲۵* منډې جوړې کړې.
د افغان ابدالیان لوبډلې تکړه ورو توپ اچوونکي قیس
احمد په دغه لوبه کې ډېره ښه توپ اچونه وکړه او د افغان لوبډلې په بریا کې یې ستره
ونډه درلوده. نوموړي په ۸ اورونو کې د ۳۷ منډو په بدل کې د سیالې لوبډلې ۳ لوبغاړي
له ډګره بهر کړل چې له امله یې د لوبې غوره لوبغاړی ونومول شو.
افغان لوبډله به د یادو سیالیو په ترڅ کې خپله
دریمه لوبه د راتلونکې دوشنبې په ورځ د سریلانکا الف لوبډلې پر وړاندې ترسره کړي.
