د اي انډ وړاندې کوونکې میرویس نیکه درې ورځنۍ سوپر کولا سیالۍ چې د هېواد د پنځو زونونو پیاوړو لوبډلو تر منځ پیل شوې دي، په پنځمه او شپږمه لوبه کې یې مس عینک او بندامیر لوبډلو بریاوي ترلاسه کړې. دغه لوبې چې د روانې اپرېل میاشتې تر ۲۳مې نېټې دوام کوي، مس عینک زون لوبډلې پکې د ۵ ویکټو په توپیر د بست زون لوبډلې ته او بندمیر زون لوبډلې د ۸ ویکټو په توپیر د سپین غر زون لوبډلو ته ماتې ورکړې.
د مس عینک او بست لوبډلو تر منځ د اي انډ
وړاندې کوونکې میرویس نیکه درې ورځنۍ سوپر کولا سیالیو پنځه لوبه چې د کندهار کرکټ
لوبغالي کې د دوشنبې پر ورځ پیل شوه، لومړی پکې بست لوبډلې توپوهنه وکړه او ټولې
یې ۳۷۸ منډې جوړې کړې. د دوی په ګټه سبحان زاخېل ۱۰۲، عزیزالله میاخېل ۷۱، نعمان
شاه ۶۹، صابر ګربز ۴۸ او علي احمد ۴۱ منډې جوړې کړې. بلخوا د مس عینک په ګټه
محمدالله لوګري ۴، یونس ځدراڼ او اصغر اتل هر یوه ۲ ویکټې په خپل نوم کړې.
د بست لوبډلې د ۳۷۸ منډو ځواب کې مس عینک
لوبډلې ټولې ۳۷۶ منډې جوړې کړې، چې په پایله کې بست لوبډلې ۲ منډې مخکیوالی ترلاسه
کړی. د مس عینک په ګټه نصیرالله ۹۷، اصغر اتل ۸۰، یونس ځدراڼ ۵۶ او مبین بختیار ۳۸
منډې ترسره کړې. دغه راز د بست لوبډلې توپ اچوونکو کې جلال ستانکزي او نبي میاخېل
۳-۳ او فهیم قاسمي ۲ ویکټې ترلاسه کړې.
د لوبې په دریمې پاڼۍ کې بست زون لوبډلې د
خپلو ټولو ویکټو په تاوان ۱۲۱ منډې جوړې کړې او د ۱۲۴ منډو هدف یې وټاکه. د دوی
لپاره سبحان زاخېل ۴۱ او نصرت نورستاني ۳۹ منډې ترلاسه کړې. د مس عینک لوبډلې په
ګټه محمدالله لوګري په زړه پورې توپ اچونه ترسره کړه او ۹ ویکټې یې په خپل نوم
کړې. نوموړي ۱۵ اورونه ترسره کړه او د ۱۶ منډو بدل کې یې ۹ لوبغاړي د لوبې له ډګره
بهر کړل.
د بست زون لوبډلې د ۱۲۴ منډو هدف مس عینک زون
لوبډلې په ۱۹ اورونو کې د ۵ ویکټو په تاوان ترلاسه کړی. د مس عینک توپوهنه کې اصغر
اتل ۳۹ او سیف ننګیال ۳۷ منډې جوړې کړې. دغه راز د بست لوبډلې لپاره نصرت نورستاني
۳ ویکټې ترلاسه کړې.
د لوبې په وروستیو کې د مس عینک لوبډلې ورو توپ اچوونکی محمدالله لوګری په دواړو پاڼیو کې د ۱۳ ویکټو په ترلاسه کولو سره د لوبې غوره لوبغاړی ونومول شو.
د سپین غر او بندامیر زونونو تر منځ لوبه چې
په هلمند کرکټ لوبغالي کې ترسره شوه، د لوبې پر لومړۍ ورځ بندامیر د لوبې پچه وګټله
او لومړی یې توپ اچونه غوره کړه. سپین غر زون لوبډلې خپلې لومړۍ پاڼۍ کې ۲۶۹ منډې
جوړې کړې. د یادې لوبډلې په ګټه ارشادالدین ساپي تر نورو زیاتې ۱۳۳ منډې جوړې کړې.
بلخوا د بندامیر لوبډلې توپ اچونه کې سیداحمد شېرزاد او مسلم موسی ۳-۳ او نصیر خان
۲ ویکټې ترلاسه کړې.
د سپین غر لوبډلې د ۲۶۹ منډو په ځواب کې
بندامیر لوبډلې د ۶ ویکټو په تاوان ۳۳۶ منډې جوړې کړې او د ۶۷ منډو مخکیوالي په
ترلاسه کولو یې بیرته یې خپلې سیالې لوبډلې ته د توپوهنې بلنه ورکړه.
د بندامیر لوبډلې توپوهنه کې خالد احمدزي ۱۴۲
ناسوځېدلي، محمد ریاض ۱۱۸ او عثمان سادات ۳۷ منډې جوړې کړې. د سپین غر لوبډلې توپ
اچوونکو کې اکرام مومند او حیات نوري ۲-۲ لوبغاړي د لوبې له ډګره بهر کړل.
د لوبې په دریمې پاڼۍ کې سپین غر زون لوبډلې
یوازې ۱۸۸ منډې جوړې کړې او د بندامیر زون لوبډلې د پور خلاصولو وروسته یې د ۱۲۲
منډو هدف وټاکه. د دوی لپاره په توپوهنه کې یوځلي بیا ارشادالدین ساپي ښه توپوهنه
وکړه او ۷۱ منډې یې جوړې کړې. د بندامیر توپ اچونه کې بیا لوبډلمشر نصیر خان ۴،
مسلم موسی او سیداحمد شېرزاد ۲-۲ ویکټې ترلاسه کړې.
د سپین غر لوبډلې د ۱۲۲ منډو هدف بندامیر
لوبډلې د لوبې په ۳۰م اور کې د ۲ ویکټو په تاوان ترلاسه کړی. د بندامیر لوبډلې
توپوهنه کې خالد احمدزي ۶۱ ناسوځېدلي منډې جوړې کړې. بلخوا د سپین غر په ګټه نظیف
الله امیري ۲ ویکټې ترلاسه کړې.
د لوبې په وروستیو کې د بندامیر لوبډلې پیلیز
توپوهونکی خالد احمدزی د ۱۴۲ او ۶۱ منډو په جوړولو سره د لوبې غوره لوبغاړی ونومول
شو.
د یادونې وړ ده، چې د اي انډ وړاندې کوونکې
میرویس نیکه درې ورځنۍ سوپر کولا سیالیو په لړ کې به د جمعې پر ورځ امو زون د سپین
غر زون پر وړاندې په کندهار کرکټ لوبغالي کې او بندامیر زون د بست زون پر وړاندې په
هلمند کرکټ لوبغالي کې د لوبو ډګر ته ووځي.