افغان کرکټ بورډ د سریلانکا پر وړاندې د یو ورځنیو او شل اوریزو سیالیو کوربه توب کوي

افغانستان کرکټ بورډ د روان کال په مارچ میاشت کې د درې نړیوالو یو ورځنیو او درې نړیوالو شل اوریزو سیالیو لپاره د سریلانکا کرکټ ملي لوبډلې کوربه توب کوي. دغه سیالۍ به د راتلونکې مارچ میاشتې په ۱۳مه نېټه په متحده عربي اماراتو کې پیل شي چې د همدې میاشتې تر ۲۵مې نېټې پورې به دوام ومومي.

دغه لوبلړۍ به د دواړو لوبډلو ترمنځ په لومړۍ شل اوریزه نړیواله لوبه پیل شي چې مارچ میاشتې په ۱۳مه نېټه به ترسره شي. د دغې لوبلړۍ دویمه لوبه به د یادې میاشتې په ۱۵مه او وروستۍ شل اوریزه نړیواله لوبه به د همدې میاشتې په ۱۷مه نېټه د متحده عربي اماراتو په شارجه کرکټ لوبغالي کې ترسره شي.

د شل اوریزو نړیوالو سیالیو له پای ته رسېدو وروسته به دواړه لوبډلې د دوبۍ په نړیوال کرکټ لوبغالي کې د یو ورځنیو سیالیو لوبلړۍ پیل کړي. د یو ورځنیو سیالیو د لوبلړۍ درې لوبې به د همدې مارچ میاشتې په شلمه، ۲۲مه او ۲۵مه نېټه ترسره شي.

د افغانستان کرکټ بورد اجراییوي رییس ښاغلي نصیب خان د سریلانکا پر وړاندې راتلونکې لوبلړۍ په اړه وویل: ((موږ لېواله یو چې د لومړي ځل لپاره د یوې بشپړې لوبلړۍ لپاره د سریلانکا کرکټ ملي لوبډلې کوربه توب کوو. موږ ژمن یو چې د کرکټ نړیوالې شورا له غړو هېوادونو سره د اغېزمنو دوه اړخیزو اړیکو پرمټ د ملي لوبډلې لپاره لا ډېرې سیالۍ برابرې کړو او د غوره او با کیفیته کرکټ د وړاندې کولو لپاره خپلو پرلپسې هلو ځلو ته دوام ورکړو. سریلانکا کرکټ ملي لوبډله په دې وروستیو کې ډېرې ښې لوبې کړې دي او موږ هیله من یو چې د دوه خورا پیاوړو لوبډلو ترمنځ به غوره او په زړه پورې سیالۍ نندارې ته وړاندې شي.))

نوموړي دغه راز زیاته کړه: ((موږ سر له اوسه د راتلونکو سترو نړیوالو، اسیایي او ګڼ شمېر دوه اړخیزو سیالیو لپاره د لوبډلې پر چمتووالي کار کوو. زموږ هڅه دا ده چې د لوبډلې پر هغو برخو لا ډېر کار وکړو چې پیاوړتیا ته اړتیا لري، ترڅو مو لوبډله راتلونکو ټولو سیالیو ته له هر اړخه بشپړه او چمتو وي.))

د یادونې وړ ده چې یادې سیالۍ به په شارجه کرکټ لوبغالي کې د افغانستان پر مهال د ماښام په ۷:۰۰ بجې او همدارنګه په دوبۍ کرکټ لوبغالي کې د ماسپښین په ۴:۰۰ بجو پیلیږي.

د سیالیو مهالوېش:

 

پای