د افغانستان کرکټ بورډ په پام کې لري چې د افغانستان شل اوریز غوره لیګ له همکار شرکت سره په ګډه همغږۍ، د یادو سیالیو د پنځو ګډونوالو لوبډلو لپاره د لوبډلمشرانو، مشر روزونکو او مشاور روزونکو یا مېنټورانو د ډرافټ مراسم ترسره کړي. دغه مراسم به د راتلونکې شنبې په ورځ، د اکټوبر میاشتې په ۲۴مه نېټه، په متحده عربي اماراتو کې ترسره شي.
د دغو مراسمو په ترڅ کې به هره لوبډله
خپل لوبډلمشر، مشر روزونکی او مشاور روزونکی یا مېنټور وټاکي؛ خو مرستیال روزونکي
او د لوبډلو نور روزونکي به د افغانستان کرکټ بورډ له لوري د هرې لوبډلې لپاره
وټاکل شي.
د افغانستان د کرکټ ملي لوبډلې شل اوریزو سیالیو
لوبډلمشر ابراهیم ځدراڼ، د
ملي لوبډلې درې پیاوړي لوبغاړي، راشد خان، عظمت الله عمرزی او رحمن الله ګربز، او د افغان لوبډلې د
دوو فارمټونو لوبډلمشر رحمت شاه زرمتی هغه
پنځه افغان لوبغاړي دي چې د لوبډلمشرۍ لپاره غوره شوي دي. د ډرافټ د مراسمو په ترڅ
کې به ګډونوالې لوبډلې له دغو لوبغاړو څخه خپل لوبډلمشران وټاکي.
دغه راز، د افغانستان کرکټ ملي لوبډلې د
توپوهنې روزونکی ټابي راډفورډ، د ملي لوبډلې مرستیال روزونکی شېن مکډرمټ، پخوانی
انګرېز لوبغاړی راوي بوپارا، د سویلي افریقا پخوانی لوبغاړی او نوموتی روزونکی
میکي ارتر، او د انګلستان تابعیت لرونکی، د پاکستان پخوانی لوبغاړی او روزونکی
اظهر محمود هغه پنځه روزونکي دي چې د مشر روزونکو د دندو لپاره غوره شوي دي. د یاد
ډرافټ د مراسمو په ترڅ کې به ګډونوالې لوبډلې له دغو روزونکو څخه خپل مشر روزونکي
وټاکي.
سربېره پر دې، د افغانستان کرکټ ملي
لوبډلې د توپ اچونې روزونکی حمید حسن، د افغانستان الف لوبډلې مشر روزونکی نوروز
منګل، د نوولس کلنې لوبډلې مشر روزونکی رییس خان احمدزی، د نوولس کلنې ملي لوبډلې
د توپوهنې روزونکی نورعلي ځدراڼ او د افغانستان کرکټ ملي لوبډلې پخوانی لوبغاړی او
روزونکی او د ظرفیت لوړونې
څانګې اوسنی مسوول دولت خان احمدزی هغه پنځه افغان روزونکي دي چې د افغانستان کرکټ
بورډ به یې د ګډونوالو لوبډلو لپاره د مرستیال روزونکو په توګه وګماري.
د روانې اکټوبر
میاشتې په ۲۴مه نېټه د لوبډلمشرانو او مشر روزونکو د ډرافټ مراسمو وروسته به ټولو لوبډلو ته فرصت ورکړل شي، څو د
خپلو لوبډلمشرانو او روزونکو په مشوره د لوبغاړو د ټاکلو لپاره چمتووالی ونیسي او
د لوبغاړو د ډرافټ په مراسمو کې د خپلو اړتیاوو او ستراتیژیو له مخې غوره لوبډلې
جوړې کړي.
د یادونې وړ ده چې د افغانستان کرکټ
بورډ او د افغانستان شل اوریز غوره لیګ همکار شرکت د لوبغاړو د ډرافټ مراسمو لپاره
هم خپل چمتووالی وروستي پړاو ته رسولی دی. دغه مراسم به د راتلونکې نومبر میاشتې
په دریمه نېټه په متحده عربي اماراتو کې ترسره شي.