د افغانستان نوولس کلنې کم عمره کرکټ لوبډلې نن د یوې خورا هر اړخیزې او عالي لوبې پرمټ سیالې د ویسټ انډیز لوبډلې ته د ۱۳۸ منډو په توپیر ستره ماتې ورکړه او د ۲۰۲۶م کال نړیوال جام سیالیو په ترڅ کې یې خپله پرلپسې دویمه بریا خپله کړه.
د دغې لوبې پچه افغان لوبډلې وګټله او لومړی
یې د توپوهنې پرېکړه وکړه. افغان لوبډلې د دغې لوبې په لومړۍ پاڼۍ کې د
خپلو ۶ لوبغاړو په زیان سره ۲۶۲ منډې جوړې کړې او سیالې ویسټ انډیزۍ لوبډلې ته یې
د ۲۶۳ منډو هدف وټاکه. د افغان لوبډلې په ګټه عثمان سادات ۸۸ او لوبډلمشر
محبوب خان ۸۶ منډې جوړې کړې.
د یاد هدف په دفاع کې افغان ځوانو بهترینه توپ اچونه وکړه او د ټولو توپ
اچوونکو د بهترینې توپ اچونې په پایله کې یې سیاله لوبډله یوازې په ۱۲۴ منډو له
ډګره بهر کړه او د ۱۳۸ منډو په توپیر یې ستره بریا خپله کړه. د افغان لوبډلې په
ګټه نصرت الله نورستاني ۴، خاطر خان ستانکزي او واحدالله ځدراڼ ۳-۳ ویکټې ترلاسه
کړې.
لوبډلمشر محبوب خان په دغه لوبه کې بهترینه توپوهنه وکړه او په ۶۹ توپونو
د دوه شپږیزو او ۱۰ څلوریزو پرمټ ۸۶ منډې
جوړې کړې چې برمټ یې د لوبې غوره لوبغاړی ونومول شو.
په دې سره افغان لوبډلې په لومړیو دوه سیالیو
کې بریاوې خپلې کړې او په خپله دریمه او د لومړي پړاو په خپله وروستۍ لوبه کې به د
راتلونکې چهارشنبې په ورځ د تانزانیا پر وړاندې د سیالۍ ډګر ته ښکته شي.