د افغانستان نوولس کلنې کم عمره کرکټ ملي لوبډلې نن د یوې خورا عالي او هر اړخیزې لوبې پرمټ د سویلي افریقا نوولس کلنې لوبډلې ته ماتې ورکړه او روان کال ځوانانو نړیوال جام سیالیو کې یې خپل سفر په بریا سره پیل کړ.
د دغې لوبې پچه سیالې سویلي افریقا لوبډلې
وګټله او لومړی یې افغان ځوانانو ته د توپوهنې بلنه ورکړه. افغان لوبغاړو خپل
لومړی پیلیز توپوهونکی ژر له لاسه ورکړ خو فیصل خان شینوزاده او خالد احمدزي د ۱۵۲
منډو ملګرتیا وکړه. فیصل خان ۸۱، خالد احمدزي ۷۴ او د لومړۍ پاڼۍ په وروستیو کې عزیر
خان نیازي بهترینه توپوهنه وکړه او ۵۱* ناسوځېدلې منډې یې جوړې کړې چې پرمټ یې
افغان ځوانانو په ټاکل شویو ۵۰ اورونو کې خپلو ۸ لوبغاړو په زیان سره ۲۶۶ منډې
جوړې کړې او سویلي افریقا لوبډلې ته یې د ۲۶۷ منډو هدف وټاکه.
د یاد هدف په دفاع کې افغان لوبغاړو لومړنی
سیال پیلیز توپوهونکي په لومړي اور کې له ډګره بهر کړ او د خپلې غوره توپ اچونې او
ډګرساتنې په دوام یې د ۱۳ اورونو ترپایه یوازې د ۴۷ منډو په بدل کې ۳ سیال لوبغاړي
له ډګره وویستل. سیالو لوبغاړو د ۶۰ منډو ملګرتیا وکړه خو افغان توپ اچوونکو یو ځل
بیا ویکټې ترلاسه کړې او د یوې جالبې لوبې په پایله کې یې سیاله لوبډله په ۲۳۸ منډو
له ډګره بهر کړه او د ۲۸ منډو په ستر توپیر یې بریا خپله کړه.
خاطر ستانکزي او عبدالعزیز خان دوه-دوه او
دغه راز نصرت الله نورستاني او حفیظ ځدراڼ یوه-یوه ویکټ ترلاسه کړه. د دوی ترڅنګ
په افغان لوبغاړو څلور سیال لوبغاړي د بهترینې ډګرساتنې په پایله کې له ډګره بهر
کړل چې پرمټ یې افغان ځوانانو ستر بری ترلاسه کړ.
عزیر الله خان نیازی د خپلې هر اړخیزې لوبې پرمټ د لوبې غوره لوبغاړی
ونومول شو. نوموړي لومړی په خورا مهم وخت کې ۵۱* منډې جوړې
کړې؛ وروسته یې په ډګر ساتنه کې یو بهترین رن-اوت وکړ او دغه راز یې دوه غوره کېچونه
ترلاسه کړل، چې پرمټ یې افغان ځوانانو سیالې سویلي افریقا لوبډلې ته د ۲۸ منډو
په توپیر ماتې ورکړه.
افغان ځوانانو په خپله لومړنۍ لوبه کې بریا خپله کړه او د روان کال نړیوال
جام سیالیو کې د غوره پیل ترلاسه کولو وروسته به د راتلونکې یکشنبې په ورځ په خپله
دویمه لوبه کې د ویسټ انډیز لوبډلې پر وړاندې د سیالۍ ډګر ته ښکته شي.