د امو زون لوبډلې نن د یوې غوره او هر اړخیزې لوبې په پایله کې د بند امیر زون لوبډلې ته د ۹۳ منډو په توپیر ماتې ورکړه او د دریمې بریا په خپلولو سره یې د زونونو په کچه د اي انډ جام لېسټ اې – یو روځنیو سوپرکولا سیالیو پایلوبې ته لاره ومونده.
د دغو سیالیو ۱۴مه لوبه نن په د ننګرهار
ولایت په غازي امان الله خان کرکټ لوبغالي کې ترسره شوه چې پچه یې د بند امیر زون
لوبډلې وګټله او لومړی یې د امو زون لوبډلې ته د توپوهنې بلنه ورکړه. امو زون
لوبډلې د دغې لوبې په لومړۍ پاڼۍ کې بهترینه توپوهنه وکړه او د خپلو ۵ لوبغاړو
په زیان سره یې ۳۰۸ منډې جوړې کړې چې له مخې یې سیالې بند امیر زون
لوبډلې ته د ۳۰۹ منډو هدف ورکړ. د دغې لوبډلې په ګټه تکړه پیلیز
توپوهونکي عمران میر غوره توپوهنه وکړه او ۱۶۱ منډې یې جوړې کړې. دا په روانو سیالیو کې د
نوموړي پرلپسې دویمه او په عموم کې څلورمه سلیزه وه چې عمران میر په لېسټ اې سیالیو
کې جوړه کړه.
د نوموړي ترڅنګ یوسف شاه ۴۵، ګلبدین نایب ۳۴* او فیصل
خان ۲۴ منډې جوړې کړې. له بلې خوا د بند امیر زون لوبډلې په ګټه سمیع الله سرمست ۲ او فریدون
داودزي یوه ویکټ ترلاسه کړه.
امو زون لوبډلې په لومړۍ پاڼۍ کې له غوره توپوهنې وروسته د دغه هدف په دفاع
کې بهترینه توپ اچونه هم وکړه او سیاله د بند امیر زون لوبډله یې په ۲۱۵ منډو له
ډګره بهر کړه. د بند امیر زون لوبډلې په ګټه جاوید احمدزي ۵۱، محمد اکرم ۴۶، سهیل
خان زرمتي ۳۶ او مجید عالم ۳۰ منډې جوړې کړې، خو د امو زون توپ اچوونکو د خپلې
غوره توپ اچونې پرمټ دغه لوبه په خپله بریا پای ته ورسوله. د دغې لوبډلې په ګټه
فضل الحق فاروقي، ګلبدین نایب او اظهار الحق نوید ۲-۲، عظیم ځدراڼ او جاوید سعیدي
یوه-یوه ویکټ ترلاسه کړه. عمران میر د لوبې غوره لوبغاړی ونومول شو.
د دغو سیالیو د لومړي پړاو وروستۍ لوبه به سبا ترسره شي چې پکې به د مس عینک
زون لوبډله په یوه خورا مهمه او برخلیک ټاکونکې لوبه کې د سپین غر زون پر وړاندې د
سیالۍ ډګر ته ښکته شي.