د اي انډ وړاندې کوونکې احمد شاه ابدالي فرسټ کلاس سوپرکولا سیالیو په شپږمه لوبه کې چې د خوست ولایت په رحمت ولي مسرور کرکټ لوبغالي کې ترسره شوه، هندوکش سټرایکرز په څلورمه او وروستۍ ورځ د میوند اتلانو لوبډلې ته د ۵ وېکټو په توپیر ماتې ورکړه.
دغه لوبه چې تېره پنجشنبه پیل شوه، پچه یې هندوکش سټرایکرز لوبډلې
وګټله او لومړی یې د میوند اتلانو پر وړاندې د توپوهنې پرېکړه وکړه. میوند اتلانو
لوبډله په خپله لومړۍ توپوهنه کې ښه کارکردګي ونه کړه او ټوله لوبډله یې د ۱۰۹ منډو جوړولو وروسته له ډګره ستنه شوه. دوی لپاره توپوهنه کې ترنورو
ډېرې منډې لوبډلمشر افسرځاځي ۳۳ او الله نور ناصري ۲۵ منډې جوړې کړې.
بل لوري ته د هندوکش سټرایکرز په توپ اچونه کې امان الله کنړي ۴، ضیاالرحمان شریفي ۲ او نورستاني عمرزي، مسلم موسی او خیر محمد
هر یوه ۱ وېکټ ترلاسه کړه.
هندوکش سټرایکرز هم د میوند اتلانو د لومړۍ پاڼۍ منډوپسې ډېرې منډې
جوړې نکړې او په ۱۶۹ منډو یې ټوله لوبډله له ډګره بهر شوه او
یوازې د ۶۰ منډو مخکې والی یې ترلاسه کړ. د هندوکش
سټرایکرز په توپوهنه کې کمال خان او مبین بختیار ترنورو ډېرې منډې جوړې کړې او په
ترتیب سره ۴۶ او ۳۷ منډې جوړې کړې.
د میوند اتلانو توپ اچونه کې نجات مسعود ۴ او بلال سمېع او عبدالله تره خیل هر یوه ۳ وېکټې ترلاسه کړې.
میوند اتلانو خپله دویمه پاڼې کې غوره توپوهنه ترسره کړه او د ۹ وېکټو په زیان سره یې ۴۰۴ منډې جوړې کړې چې پکې د جاوید احمدزي ۱۴۲، خالد احمدزي ۷۲، رحمان الله ځدراڼ ۶۸ او اعجاز احمدزي ۵۱ منډې د پام وړ وې چې په دې پاڼۍ سره یې د
هندوکش سټرایکرز ته د ۳۴۵ منډو هدف وټاکه. دا ځل هندوکش ته په توپ
اچونه کې نصرت نورستاني ۴، امان الله ۲ او مسلم موسی، خیر محمد او سمېع شینواري هر یوه ۱ وېکټ ترلاسه کړه.
هندوکش سټرایکرز یاد هدف د پیلیز توپوهونکو عبدالملک او مبین بختیار
په سلیزو چې دواړو ۱۰۱ او ۱۰۱ منډې جوړې او مډل ارډر کې د سمېع شینواري د ۵۴ ناسوځېدلو او مسلم موسی۳۷
ناسوځېدلو منډو پر مټ پوره او لوبه یۍ د ۵ وېکټو
په توپیر وګټله.
د هندوکش سټرایکرز پیلیز توپوهونکی مبین بختیار چې لومړۍ پاڼۍ
کې یې ۳۷ او دویمه کې ۱۰۱ منډې جوړې کړې، د لوبې غوره لوبغاړی ونومول شو.