د وزیر محمد اکبر خان دویمه درجه ولایتي لوبو په لړ کې نن هم شپږ لوبې ترسره شوې. د یادو لوبو په لړ کې پکتیا د هلمند، کابل ډي د غزني، ننګرهار ب د جوزجان، خوست الف د پروان، کندز د نورستان او لوګر د فاریاب لوبډلې له ماتې سره مخ کړې. باید وویل شي چې د وزیر محمد اکبر خان دویمه درجه ولایتي لوبو په لړ کې به سبا یوازې یوه لوبه په ننګرهار غازي امان الله خان لوبغالي کې ترسره شي.
د کندهار په قریشي لوبغالي کې نن د پکتیا او
هلمند لوبډلو تر منځ لوبه ترسره شوه، چې پکتیا پکې د ۶ ویکټو په توپیر بریا خپله
کړه. یاده لوبه کې لومړی هلمند توپوهنه وکړه او د ۱۵۵ منډو هدف یې وټاکه. د دوی په
ګټه شریف الله بارکزي ۵۴ او قدرت الله ۲۸ منډې جوړې کړې. باید وویل شي چې د پکتیا
په توپ اچونه کې سمیع مبارز ۷ او حقمل اریا ۳ لوبغاړي د لوبې له ډګره بهر کړل.
د هلمند لوبډلې هدف پکتیا لوبډلې د لوبې په
۳۴م اور کې ترلاسه کړی. د پکتیا په
توپوهنه کې رحمن ۸۱ ناسوځېدلي او حبیب الله ۲۱ منډې جوړې کړې. د هلمند په توپ
اچونه کې عثمان ابدال ۳ ویکټې په خپل نوم کړې. د پکتیا لوبډلې توپ اچوونکی سمیع
مبارز د لوبې غوره لوبغاړی ونومول شو.
د خوست رحمت ولي مسرور لوبغالي کې لوګر په ۸
ویکټو فاریاب ته ماتې ورکړه. دغه لوبه کې فاریاب شاه محمد او سمیع الله هر یوه ۲۴
منډو پر مټ د ۱۶۹ منډو هدف وټاکه. د لوګر په ګټه اکبر احمدزي ۴، محمد احمدزي ۳ او
حمید ۲ ویکټې ترلاسه کړې.
د فاریاب لوبډلې هدف لوګر لوبډلې د لوبې په
۲۷م اور کې د ۲ ویکټو په تاوان ترلاسه کړی. د دوی په توپوهونکو کې منصور ۷۲ او فضل
الحق ۳۸ منډې جوړې کړې. د فاریاب په توپ اچونه کې سمیع الله او زبیح الله ۱-۱ ویکټ
ترلاسه کړه. د لوګر لوبډلې لوبغاړی اکبر احمدزی د لوبې غوره لوبغاړی شو.
د ننګرهار غازي امان الله خان لوبغالي کې د
کندز لوبډلې د ۷ ویکټو په توپیر د نورستان لوبډلې ته ماتې ورکړه. په یاده لوبه کې
نورستان لوبډلې د ۱۶۹ منډو هدف ټاکلی و. د دوی په توپوهنه کې نورالله ۶۳ او محمد
فهیم ۲۷ منډې جوړې کړې. د کندز په توپ اچونه کې ګل نور ۳، شبیر، هارون او نصیب
الله هر یوه ۲ ویکټې په خپل نوم کړې.
د نورستان لوبډلې هدف کندز لوبډلې د لوبې په
۱۹م اور کې د دریو ویکټو په تاوان ترلاسه کړی. د کندز توپوهنه کې نجیب الله الکوزي
۱۱۵ ناسوځېدلي منډې جوړ کړې. باید وویل شي چې د نورستان په ګته احسان الله ۳
لوبغاړي د لوبې له ډګره بهر کړل. د کندز لوبډلې توپوهونکی نجیب الله الکوزی د لوبې
غوره لوبغاړی شو.
د کندهار کرکټ لوبغالي کې کابل ډي لوبډلې د
۸۴ منډو په توپیر د غزني لوبډلې ته ماتې ورکړه. دغه لوبه کې لومړی کابل ډي توپوهنه
وکړه او د ۲۵۷ منډو هدف یې وټاکه. د دوی په ګټه حمزه ۵۹، زین الله ۵۳، اجمل مایار
۵۱ او رحیم الله ۵۰ منډې ترسره کړې. بلخوا د غزني په توپ اچونه کې شمس فخري او
شېرالله ۱-۱ ویکټ ترلاسه کړه.
د کابل ډي لوبډلې د هدف په ځواب کې غزني
لوبډلې د ټولو لوبغاړو په تاوان ۱۷۲ منډې جوړې کړې. د دوی په توپوهونکو کې محیب
الله جلالزي تر نورو زیاتې ۴۶ منډې جوړې کړې. بلخوا د کابل ډي په ګټه جمعه سلطاني
۴، روح الله، عبدالحلیم او محمد عثمان هر یوه ۲ ویکټې ترلاسه کړې. د لوبې غوره لوبغاړی
جمعه سلطاني ونومول شو.
کونړ کې بیا د ننګرهار ب لوبډلې د جوزجان
لوبډلې ته ماتې ورکړه. دغه لوبه کې ننګرهار ب لوبډلې د عنایت الله ۹۳ او نجیب قاضي
خېل ۹۵ منډو پر مټ د ۲۹۶ منډو هدف وټاکه. د جوزجان په توپ اچونه کې جاوید سیدي ۳،
رسول او سیدجلال ۲-۲ ویکټې په خپل نوم کړې.
د ننګرهار ب لوبډلې د هدف په ځواب کې جوزجان
لوبډلې یوازې ۲۵۷ منډې جوړې کړې. د یادې لوبډلې توپوهنه کې نصرالله ترکمن ۹۳ او
سید جلال ۴۸ منډې جوړې کړې. د ننګرهار ب لوبډلې توپ اچوونکو کې اکرام مومند ۴ او
فهیم قاسمي ۲ ویکټې ترلاسه کړې. د یادې لوبې غوره لوبغاړی نجیب قاضي خېل ونومول
شو.
خوست رحمت ولي مسرور لوبغالي کې خوست الف
لوبډلې د پروان لوبډلې ته ماتې ورکړه. دغه لوبه کې خوست الف لوبډلې د ۳۸۱ منډو هدف
ټاکلی و. د دوی توپوهونکو کې سیف ننګیال ۱۲۴، عبدالله محمدي ۱۱۷، صابر ګربز ۴۸ او
سید الرحمن ۳۹ منډې ترسره کړې. د پروان په توپ اچوونکو کې سیف الله ۳ او امیدالله
۲ ویکټې ترلاسه کړې.
د خوست الف لوبډلې د هدف ځواب کې پروان ۲۰۷
منډې جوړې کړې او د ۱۷۳ منډو په توپیر یې ماتې ومنله. د دوی توپوهنه کې سیف الله
۷۰، رحمت الله ۵۴ او عزت فاروقي ۲۶ منډې جوړې کړې. د خوست الف په توپ اچونه کې
حبیب الله ۴، فرمان الله او عبدالله محمدي ۲-۲ ویکټې ترلاسه کړې. د یادې لوبې غوره
لوبغاړی عبدالله محمدي ونومول شو.
د یادونې وړ ده چې د وزیر محمد اکبر خان
دویمه درجه ولایتي لوبو په لړ کې به سبا د ننګرهار غازي امان الله خان لوبغالي کې
سرپل د ننګرهار الف لوبډلې پر وړاندې د لوبې ډګر ته ووځي.