د وزیر محمد اکبر خان لومړۍ درجه ولایتي سیالیو په روان بهیر کې نن دوه لوبې ترسره شوې، چې د خوست په رحمت ولي مسرور لوبغالي کې کندهار الف لوبډلې د ۷ ویکټو په توپیر د اي سي بي ایلېون او د ننګرهار په نجیب الله تره کي لوبغالي کې ډومیسټیک ایلېون-۲ لوبډلې د ۵۵ منډو په توپیر د لوګر لوبډلې له ماتې سره مخ کړې.
د لوګر او ډومیسټیک ایلېون-۲ لوبډلو تر منځ د
نن لوبه کې لومړی ډومیسټیک ایلېون-۲ لوبډلې توپوهنه ترسره کړه او د ۲۷۲ منډو هدف
یې وټاکه. د یادې لوبډلې په ګټه سهراب امیري ۷۰، ضیاء الدین شریفي ۶۵ او سید جلال
هاشمي ۴۳ ناسوځېدلي منډې ترسره کړې. بلخوا د لوګر لوبډلې توپ اچونه کې محمدالله
لوګري او اکبر احمدزي ۲-۲ ویکټې په خپل نوم کړې.
د ډومیسټيک ایلېون-۲ لوبډلې د هدف په ځواب کې
لوګر لوبډلې د خپلو ټولو ویکټو په تاوان یوازې ۲۱۶ منډې جوړې کړې او د ۵۵ منډو په
توپیر یې ماتې ومنله. د دوی په توپوهنه کې سهیل خان ۹۴، عزت نور ۵۱ او منصور خان
۳۸ منډې ترسره کړې. د ډومیسټیک ایلېون-۲ لوبډلې توپ اچونه کې جاوید سیدي ۵، حمید
هوتک او سید جلال هاشمي ۲-۲ لوبغاړي د لوبې له ډګره بهر کړل.
د ډومیسټیک ایلېون-۲ لوبډلې توپ اچوونکی
جاوید سیدي د ۵ مهمو ویکټو په ترلاسه کولو سره د یادې لوبې غوره لوبغاړی ونومول
شو.
د کندهار الف او اي سي بي ایلېون لوبډلو تر
منځ لوبه کې بیا کندهار الف لوبډلې د ۷ ویکټو په توپیر بریا ترلاسه کړه. یاده لوبه
کې لومړی اي سي بي ایلېون لوبډلې توپوهنه وکړه او د ۱۴۵ منډو هدف یې وټاکه. د یادې
لوبډلې لپاره صدیق پاچا ۵۴ او راحت اندړ ۲۵ منډې جوړې کړې. د کندهار الف لوبډلې
توپ اچوونکو کې سمیع سرمست ۵ او احمدولي سیال ۳ ویکټې په خپل نوم کړې.
د اي سي بي ایلېون لوبډلې هدف کندهار الف
لوبډلې د لوبې په ۱۹م اور کې د ۳ ویکټو په تاوان ترلاسه کړی. د کندهار الف لوبډلې
توپوهنه کې نعمان شاه ۵۶، جلال احمد ۳۴ او بلال احمد ۲۴ منډې جوړې کړې. باید وویل
شي چې د اي سي بي ایلېون په توپ اچونه کې شریف الله، رحمت الله او صدیق باچا ۱-۱
ویکټ ترلاسه کړه.
د کندهار الف لوبډلې چټک توپ اچوونکی سمیع
سرمست د ۵ ویکټو په ترلاسه کولو سره د لوبې غوره لوبغاړی ونومول شو.
د یادونې ده چې د وزیر محمد اکبر خان لومړۍ
درجه ولایتي سیالیو په دوام به سبا د ننګرهار نجیب الله تره کي لوبغالي کې کابل
الف د چېرمېن ایلېون او د خوست رحمت ولي مسرور لوبغالي کې خوست د پکتیکا لوبډلو پر
وړاندې د لوبو ډګر ته ښکته شي.