د وزیر محمد اکبر خان لومړۍ درجه ولایتي سیالۍ چې نن خوست کې د ډومیسټیک ایلېون او
خوست لوبډلو په لوبې پیل شوې، خوست لوبډلې پکې د ۲۷ منډو په توپیر سره د ډومیسټیک ایلېون
لوبډلې ته ماتې ورکړه. د افغانستان د کورني کرکټ وزیر محمد اکبر خان لومړۍ درجه
ولایتي سیالۍ چې هر کال ترسره کیږي، پر مټ یې د هېواد له بېلابېلو سیمو با
استعداده ځوان لوبغاړي او د کورني کرکټ نوموتي او پیاوړي لوبغاړي د کورني کرکټ
سترو، لېسټ اې، ملي شل اوریزو او میرویس نیکه درې ورځنیو سیالیو ته لار مومي. د
دغه لوبو د الف ګروپ لوبې به هم سبا په ننګرهار کې پیل شي.
د خوست او ډومیسټیک ایلېون لوبډلو تر منځ د
نن لوبه چې د خوست په رحمت ولي مسرور لوبغالي کې ترسره شوه، په لوبغالي کې لومړی د
لندبل له وجې ۴۲ اورونو ته راښکته شوه چې وروسته پکې خوست لوبډلې بریا ترلاسه کړه.
د یادې لوبې پچه د ډومیسټیک ایلېون لوبډلې وګټله او لومړی یې د توپ اچونې پرېکړه
وکړه.
خوست لوبډلې د سهار په سختو شرایطو کې وکولی شوه، چې ښه توپوهنه ترسره کړي او د
۲۵۸ منډو هدف وټاکي. د یادې لوبډلې په توپوهنه کې نصیراحمد ۷۳، عابدالله عابد ۶۷،
سیف ننګیال ۳۲ او نوید عبید ۲۷ منډې جوړې کړې. باید وویل شي چې د ډومیسټیک ایلېون
لوبډلې په توپ اچونه کې محمدنبي میاخېل ۵ او کامل کاکړ ۲ لوبغاړي د لوبې له ډګره
بهر کړل.
د خوست لوبډلې د ټاکلي هدف په ځواب کې ډومیسټیک
ایلېون لوبډلې په ټاکلو ۴۲ اورونو کې د ۸ ویکټو په له لاسه ورکولو سره ۲۳۰ منډې
جوړې کړې او د ۲۷ منډو په توپیر یې ماتې ومنله. د یادې لوبډلې په توپوهنه کې اسلام
ځاځي ۶۶، محمد ریاض ۴۵، عبدالهادي ۴۲ او جاوید احمدزي ۲۲ منډې جوړې کړې. بلخوا د
خوست لوبډلې توپ اچونه کې حبیب الله تڼیوال ۳ او یونس ځدراڼ ۲ ویکټې په خپل نوم
کړې.
د لوبې په وروستیو کې د خوست لوبډلې الراونډر
محمد یونس ځدراڼ د ۲۷ ناسوځېدلو منډو او ۲ ویکټو په ترلاسه کولو سره د لوبې غوره
لوبغاړی ونومول شو.
د یادونې وړ ده چې د وزیر محمد اکبر خان
لومړۍ درجه ولایتي سیالیو په دوام به سبا سهار نهه بجې د خوست رحمت ولي مسرور
لوبغالي کې کندهار الف د ننګرهار ب او د ننګرهار په نجیب الله تره کي لوبغالي کې ننګرهار د ډومیسټیک ایلېون-۲ لوبډلو پر وړاندې د لوبو ډګر ته ووځي.