د وزیر محمد اکبر خان لومړۍ درجه ولایتي سیالۍ چې په خوست او ننګرهار ولایتونو کې
د ۱۲ پیاوړو لوبډلو تر منځ روانې دي، نن یې په لړ کې ننګرهار لوبډلې د لوګر لوبډلې
ته او ډومیسټیک ایلېون لوبډلې د اي سي بي ایلېون لوبډلې ته ماتې ورکړې.
د ننګرهار او لوګر لوبډلو تر منځ لوبه چې د
ننګرهار په نجیب الله تره کي لوبغالي کې ترسره شوه، د ننګرهار لوبډلې پکې د ۵
ویکټو په توپیر لوګر لوبډلې ته ماتې ورکړه. دغه لوبه کې لومړی لوګر توپوهنه وکړه،
چې د ټولو ویکټو په تاوان یې یوازې ۱۴۲ منډې هدف وټاکه.
د لوګر لوبډلې په توپوهنه کې صابر حنیف ۵۲،
منصور خان ۳۱ او یوسف خان ۲۹ منډې جوړې کړې. بلخوا بیا د ننګرهار لوبډلې په توپ
اچونه کې اقدام الحق ۳، یما عرب او محمد ابراهیم هر یوه ۲ لوبغاړي د لوبې له ډګره
بهر کړل.
د لوګر لوبډلې ټاکلی هدف ننګرهار لوبډلې د
لوبې په ۲۹م اور کې د ۵ ویکټو په تاوان ترلاسه کړی. د ننګرهار توپوهونکو کې اکبر موسی
زي ۵۰، الله نور ناصري ۲۹ او عثمان یونس ۲۸ منډې جوړې کړې. باید وویل شي چې د لوګر
لوبډلې توپ اچوونکو کې رشید ځاځي او محمدالله لوګري هر یوه ۲ ویکټې په خپل نوم
کړې.
د ننګرهار لوبډلې چټک توپ اچوونکی اقدام الحق
د ۳۹ منډو بدل کې د ۳ مهمو ویکټو په ترلاسه کولو سره د لوبې غوره لوبغاړی ونومول
شو.
د خوست په رحمت ولي مسرور لوبغالي کې بیا ډومیسټیک
ایلېون لوبډلې په ۳ ویکټو اي سي بي ایلېون لوبډلې ته ماتې ورکړه. یاده لوبه کې لومړی
اي سي بي ایلېون لوبډلې توپوهنه وکړه او د ۹ ویکټو په تاوان یې ۲۳۶ منډې هدف
وټاکه. د دوی په توپوهونکو کې اصف شاه ۶۱، کمال خان ۵۵ او اعجاز الحق نورزي ۳۴
منډې جوړې کړې. د ویلو ده چې د ډومیسټیک ایلېون لوبډلې توپ اچونه کې کامل کاکړ ۴
او خیر محمد علیزي ۳ ویکټې ترلاسه کړې.
د اي سي بي ایلېون لوبډلې د ۲۳۶ منډو هدف
ډومیسټیک ایلېون لوبډلې د لوبې په ۳۹ اورونو کې د ۷ ویکټو په تاوان ترلاسه کړی. د
یادې لوبډلې په ګټه نجیب الله الکوزي ۷۱، جاوید احمدزي ۵۴ او حیات نوري ۴۴ منډې
جوړې کړې. د اي سي بي ایلېون توپ اچونه کې اعجاز الحق نورزي، ابوذر ساپي او فرهاد
علي ۲-۲ ویکټې په خپل نوم کړې.
د ډومیسټیک ایلېون لوبډلې چټک توپ اچوونکی
کامل کاکړ د ۵۲ منډو بدل کې د ۴ ویکټو په ترلاسه کولو سره د یادې لوبې غوره
لوبغاړی ونومول شو.
د یادونې وړ ده چې د وزیر محمد اکبر خان
لومړۍ درجه ولایتي سیالیو په لړ کې به سبا سهار د خوست رحمت ولي مسرور لوبغالي کې
کندهار الف د پکتیکا او د ننګرهار په نجیب الله تره کي لوبغالي کې ډومیسټیک ایلېون-۲
د چېرمېن ایلېون لوبډلو پر وړاندې د لوبو ډګر ته ووځي.