د وزیر محمد اکبر خان لومړۍ درجه ولایتي سیالیو په روان بهیر کې نن خوست لوبډلې د
۱۲۷ منډو په توپیر د کندهار الف او لوګر لوبډلې په ۸ منډو توپیر د چېرمېن ایلېون
لوبډلو ته ماتې ورکړې. د وزیر محمد اکبر خان لومړۍ درجه ولایتي سیالیو کې ټولې ۱۲
لوبډلې ګډون لري چې له منځه به یې څلور غوره لوبډلې نیمه پایلوبو ته لار ومومي.
د لوګر او چېرمېن ایلېون لوبډلو تر منځ لوبه
چې د ننګرهار په نجیب الله تره کي لوبغالي کې ترسره شوه، لوګر لوبډلې پکې د ټولو ویکټو
په تاوان ۱۸۱ منډې هدف وټاکه. د دوی په توپوهنه کې عزت نور ۸۰ او محمد امین ۳۰ منډې
ترسره کړې. بلخوا د چېرمېن ایلېون لوبډلې توپ اچوونکو کې اسدالله متاڼي او محمد
علي ۳-۳ او رحیم الله ۲ ویکټې په خپل نوم کړې.
د لوګر لوبډلې د هدف په ځواب کې چېرمېن
ایلېون لوبډلې د خپلو ټولو ویکټو په تاوان ۱۷۲ منډې جوړې کړې او د ۸ منډو په توپیر
یې لوبه وبایلله. د چېرمېن ایلېون توپوهونکو کې اعجازاحمد ۳۷، افتاب عالم ۳۴ او
فضل عثمان ۳۰ منډې جوړې کړې. د ویلو ده چې د لوګر لوبډلې توپ اچونه کې محمد داود ۵
او محمدالله ۲ لوبغاړي د لوبې له ډګره بهر کړل.
د لوګر لوبډلې توپ اچوونکی محمد داود د ۵
مهمو ویکټو په ترلاسه کولو سره د لوبې غوره لوبغاړی ونومول شو.
د خوست په رحمت ولي مسرور لوبغالي کې بیا
خوست لوبډلې د ۱۲۷ منډو په توپیر د کندهار الف لوبډلې ته ماتې ورکړه. دغه لوبه کې خوست
لوبډلې د نصیراحمد ۷۸، سیف ننګیال ۳۸ او نقیب احساس ۳۷ منډو پر مټ د ۲۳۸ منډو هدف
وټاکه. بلخوا د کندهار الف په توپ اچونه کې عبدالباقي پوپل او سمیع سرمست هر یوه ۳
ویکټې ترلاسه کړې.
د خوست لوبډلې د هدف په ځواب کې کندهار الف
لوبډلې د خپلو ټولو ویکټو په تاوان یوازې ۱۱۰ منډې ترسره کړې او د ۱۲۷ منډو په
توپیر یې ماتې ومنله. د دوی په توپوهنه کې نعمان شاه ۲۷ او بلال احمد ۲۶ منډې
ترسره کړې. باید وویل شي چې د خوست لوبډلې په ګټه شفیع الله خان ۵، محمد احمدزي ۳
او عبدالله محمدي ۲ ویکټې په خپل نوم کړې.
د لوبې په وروستیو کې د خوست لوبډلې توپ
اچوونکی شفیع الله خان په ۵ ویکټو د لوبې غوره لوبغاړی شو.
د ویلو ده چې د وزیر محمد اکبر خان لومړۍ
درجه ولایتي سیالیو په دوام به سبا د ننګرهار نجیب الله تره کي لوبغالي کې کابل
الف د ننګرهار او د خوست رحمت ولي مسرور لوبغالي کې ډومیسټیک ایلېون د ننګرهار-ب
لوبډلو پر وړاندې د لوبو ډګر ته ښکته شي.