د وزیر محمد اکبر خان دویمه درجه ولایتي سیالۍ چې د ۴۰ بېلابېلو لوبډلو تر منځ پیل شوي وې، نن يې په روان بهیر کې درې لوبې ترسره شوې. په لومړۍ لوبه کې چې د ننګرهار غازي امان الله خان لوبغالي کې ترسره شوه، پکتیکا د نورستان، دویمه لوبه چې کندهار کرکټ لوبغالي کې وشوه، لغمان د هرات او دریمه لوبه چې د کندهار په قریشي لوبغالي کې ترسره شوه، خوست ب پکې د نیمروز لوبډلې ته ماتې ورکړې. د دغه سیالیو په دوام به سبا هم درې لوبې ترسره شي.
نن لومړۍ لوبه چې د ننګرهار په غازي امان الله خان لوبغالي کې
ترسره شوه، پکتیکا لوبډلې پکې د ۸ ویکټو په توپیر د نورستان لوبډلې ته ماتې ورکړه.
یاده لوبه کې نورستان لوبډلې لومړی توپوهنه وکړه او د ټولو ویکټو په تاوان یې ۱۲۷
منډې جوړې کړې. د یادې لوبډلې په ګټه کمال خان بارکزي ۲۰ او نورالله ۱۷ منډې جوړې
کړې. بلوا د پکتیکا په توپ اچونه کې محمد عالم ۳، سمیع الله، زبیح الله او عنایت
الله ۲-۲ ویکټې ترلاسه کړې.
د نورستان د لوبډلې هدف پکتیکا لوبډلې یوازې
د ۲ ویکټو په تاوان د لوبې په ۲۴م اور کې ترلاسه کړی. د دوی په توپوهونکو کې حفیظ
ځدراڼ ۵۲ ناسوځېدلي، اکبر افغان ۲۶ او عطامحمد زرمل ۲۵ منډې جوړې کړې. د نورستان
لوبډلې په توپ اچونه کې کمال خان بارکزي او حلیم نورستاني هر یوه ۱ ویکټ ترلاسه
کړه. د پکتیکا لوبډلمشر محمد عالم خان د لوبې غوره لوبغاړی شو.
کندهار کرکټ لوبغالي کې بیا لغمان لوبډلې د
هرات لوبډلې ته ماتې ورکړه. یاده لوبه کې لومړی د لغمان لوبډلې د نویدالله ۶۸،
مجبور خروټي ۴۱ او شوکت افغان ۳۷ منډو پر مټ د ۲۳۸ منډو هدف وټاکه. د هرات لوبډلې
په توپ اچوونکو کې محمد علي ۳، رحمت الله او سیداحمد قریشي ۲-۲ ویکټې په خپل نوم
کړې.
د لغمان د ۲۳۸ منډو هدف په تعقیب کې هرات لوبډلې د خپلو ټولو ویکټو په تاوان سره یوازې
۱۷۹ منډې جوړې کړې او د ۵۸ منډو په توپیر یې ماتې ومنله. د یادې لوبډلې په ګټه قدرت
الله ۵۱، کریم خان ۴۱ او محمد علي ۳۳ منډې جوړې کړې. د لغمان لوبډلې په توپ اچونه
کې مجبور خروټي ۵ او ګلزار لغماني ۳ ویکټې ترلاسه کړې. د لغمان لوبډلې لوبغاړی
مجبور خروټی د لوبې غوره لوبغاړی ونومول شو.
د یادونې وړ ده چې د وزیر محمد اکبر خان
دویمه درجه ولایتي لوبو په لړ کې به سبا سهار د ننګرهار په غازي امان الله خان
لوبغالي کې سرپل د کندز، د کندهار کرکټ لوبغالي کې کابل اي د لغمان او د کندهار قریشي
لوبغالي کې به هرات د نیمروز لوبډلو پر وړاندې د لوبو ډګر ته ښکته شي.