د وزیر محمد اکبر خان لومړۍ درجه ولایتي شل اوریزه سیالۍ چې تېره ورځ پیل شوې، نن یې پر دویمه ورځ لوګر لوبډلې په ۲۰ منډو ننګرهار لوبډلې ته، ډومیسټيک ایلېون-۲ لوبډلې په ۵ ویکټو توپیر د خوست-ب لوبډلې ته، خوست لوبډلې په ۴ ویکټو توپیر د کابل الف لوبډلې ته او ننګرهار-ب لوبډلې په ۶ ویکټو ډومیسټیک ایلېون لوبډلې ته ماتې ورکړې. د یادو سیالیو په دوام به سبا هم څلور لوبې په کندهار او ننګرهار ولایتونو کې ترسره شي.
د لوګر او ننګرهار لوبډلو تر منځ لوبه چې په
کندهار کرکټ لوبغالي کې ترسره شوه، لوګر پکې د ۲۰ منډو په توپیر بریا خپله کړه.
دغه لوبه کې لوګر لوبډلې لومړی توپوهنه وکړه، چې د فضل الحق ۶۰ او منصور خان ۲۹
منډو پر مټ یې په ۲۰ اورونو کې د ۱۶۰ منډو هدف وټاکه. د ننګرهار لوبډلې په ګټه بیا
یما عرب ۲ ویکټې ترلاسه کړې.
د لوګر لوبډلې د هدف ځواب کې ننګرهار لوبډلې
ټاکلو ۲۰ اورونو کې ۱۳۹ منډې جوړې کړې او ماتې یې ومنله. د دوی توپوهنه کې عثمان
نوري ۵۵ او ارشاد ساپي ۲۴ منډې جوړې کړې. بلخوا د لوګر لوبډلې توپ اچوونکو کې سمیع
مبارز ۴ ویکټې په خپل نوم کړې.
د لوګر لوبډلې توپ اچوونکی سمیع مبارز د ۱۷
منډو بدل کې د ۴ ویکټو په ترلاسه کولو سره د لوبې غوره لوبغاړی ونومول شو.
د کندهار په قریشي لوبغالي کې بیا ډومیسټيک
ایلېون-۲ لوبډلې د ۵ ویکټو په توپیر د خوست-ب لوبډلې ته ماتې ورکړه. یاده لوبه کې
لومړی خوست-ب توپوهنه وکړه، چې د جمشېد خان ۵۳ او رحمن ریحان ۴۰ منډو پر مټ یې د
۱۷۵ منډو هدف وټاکه. د ډومیسټیک ایلېون-۲ په ګټه سید جلال، عرب مومند او جاوید
سیدي ۱-۱ ویکټ په خپل نوم کړه.
د خوست-ب لوبډلې هدف ډومیسټیک ایلېون-۲
لوبډلې د لوبې په ۱۸م اور کې د ۵ ویکټو په تاوان ترلاسه کړی. د یادې لوبډلې
توپوهنه کې ضیاء الدین شریفي ۴۰ او جاوید سلیمانخېل ۷۲ منډې جوړې کړې. بلخوا د
خوست-ب په توپ اچونه کې حمزه او عزت الله ۲-۲ لوبغاړي د لوبې له ډګره بهر کړل.
د ډومیسټيک ایلېون-۲ لوبډلې توپوهونکی جاوید
سلیمانخېل د ۷۲ منډو په جوړولو سره د لوبې غوره لوبغاړی شو.
د ننګرهار په غازي امان الله خان لوبغالي کې
بیا خوست لوبډلې د کابل الف لوبډلې ته ماتې ورکړه. یاده لوبه کې کابل الف لوبډلې
لومړی توپوهنه وکړه او د ۱۵۷ منډو هدف یې وټاکه. د دوی په توپوهنه کې محمد هارون
۷۰ او نصیراحمد ۲۲ منډې جوړې کړې. د خوست په توپ اچونه کې عابدالله محمدي ۲ ویکټې
ترلاسه کړې.
د کابل الف لوبډلې هدف خوست لوبډلې د لوبې په
وروستي اور کې د ۶ ویکټو په تاوان ترلاسه کړی. د دوی توپوهنه کې نوید عبید ۵۱،
طاهر سروري ۲۷ او یونس ځدراڼ ۲۶ منډې جوړې کړې. بلخوا د کابل الف په توپ اچونه کې
مسلم موسی ۳ ویکټې په خپل نوم کړې.
د خوست لوبډلې الراونډر یونس ځدراڼ د ۱ ویکټ
او ۲۶ منډو په ترلاسه کولو د لوبې غوره لوبغاړی شو.
د ننګرهار په نجیب الله تره کي لوبغالي کې
بیا ننګرهار-ب لوبډلې ډومیسټیک ایلېون لوبډلې ته ماتې ورکړه. دغه لوبه کې ډومیسټیک
ایلېون لوبډلې لومړی توپوهنه وکړه، چې د جاوید احمدزي ۶۹ او اسلام ځاځي ۲۶ منډو پر
مټ یې د ۱۲۷ منډو هدف وټاکه. د ننګرهار-ب په توپ اچوونکو کې افتاب عالم او فهیم
قاسمي هر یوه ۲ لوبغاړي د لوبې له ډګره بهر کړل.
د ډومیسټيک ایلېون لوبډلې هدف ننګرهار-ب
لوبډلې د لوبې په ۱۹م اور کې د ۴ ویکټو په تاوان ترلاسه کړی. د دوی په ګټه عابد
محمدي ۳۰، شوکت زمان ۲۵ او نجیب قاضي خېل ۲۴ منډې جوړې کړې. بلخوا د ډومیسټیک
ایلېون په توپ اچونه کې کامل کاکړ، حیات نوري، رحمت اتل او صابر بهرامي ۱-۱ ویکټ
په خپل نوم کړه.
د لوبې په وروستیو کې د ننګرهار-ب لوبډلې توپ
اچوونکی فهیم قاسمي د ۲۳ منډو بدل کې د ۲ مهمو ویکټو په ترلاسه کولو د لوبې غوره
لوبغاړی شو.
د یادونې وړ ده، چې د وزیر محمد اکبر خان
لومړۍ درجه ولایتي شل اوریزه سیالیو په دوام به سبا ۱۱:۰۰ بجې د
کندهار کرکټ لوبغالي کې چېرمېن ایلېون د ډومیسټیک ایلېون-۲، د کندهار قریشي
لوبغالي کې خوست-ب د کندهار الف، د ننګرهار په غازي امان الله خان لوبغالي کې خوست
د ننګرهار-ب او د ننګرهار نجیب الله تره کي لوبغالي کې اي سي ایلېون د پکتیکا لوبډلو
پر وړاندې د لوبو ډګر ته ښکته شي.