ماهیپر ستورو د یوې غوره او هر اړخیزې لوبې په پایله کې د میوند اتلان لوبډلې ته د ۶ ویکټو په توپیر ماتې ورکړه او په نهم پړاو اي انډ وړاندې کوونکو احمد شاه ابدالي فرسټ کلاس سوپرکولا سیالیو کې یې خپله لومړۍ بریا خپله کړه.
دغه لوبه د
ننګرهار ولایت په غازي امان الله خان کرکټ لوبغالي کې ترسره شوه چې پچه یې د ماهیپر ستورو لوبډلې وګټله او لومړی یې د توپ اچونې پرېکړه وکړه. دغې
لوبډلې د یوې غوره او بهترینې توپ اچونې په پایله
کې د لوبډلمشر یمین خان
احمدزي او ابراهیم عبدالرحیمزي د غوره توپ اچونې پرمټ میوند
اتلان لوبډله یوازې په ۷۱ منډو له ډګره بهر کړه. یمین احمدزي خورا ښه توپ اچونه وکړه او ۶ ویکټې یې
ترلاسه کړې. د نوموړي ترڅنګ ابراهیم عبدالرحمیزی هم ښه وځلېده او ۴ ویکټې یې
ترلاسه کړې.
ماهیپر ستورو د خپلې
غوره توپ اچونې وروسته ښه توپوهنه هم وکړه او د میوند اتلانو د لومړۍ پاڼۍ د ۷۱ منډو په ځواب کې یې د خپلو ټولو لوبغاړو په زیان سره ۱۹۹ منډې جوړې کړې او له سیالې لوبډلې یې د ۱۲۸ منډو مخکېوالی ترلاسه کړ. د
دغې لوبډلې په ګټه ریاض حسن ۶۳ او محمد اسحق ۵۸ منډې جوړې کړې. له بلې خوا د میوند
اتلانو په ګټه افتاب عالم ۵، نجات مسعود او بلال سمیع ۲-۲ او عبدالله تره خېل یوه
ویکټ ترلاسه کړه.
د دغې لوبې دوه لومړۍ
پاڼۍ د لومړۍ ورځې له پای ته رسېدو وړاندې پای ته ورسېدې، کله چې میوند اتلانو
توپوهنه پیل کړه نو یو ځل بیا د ماهیپر ستورو د غوره توپ اچونې سره مخ شوه او د
ورځې تر پایه یې یوازې په ۲۲ منډو کې خپل ۶ لوبغاړي له ډګره بهر شول. اعجاز احمدزی
او عبدالله تره خېل لوبغالي ته ښکته شول او د دویمې ورځې په پیل کې یې خورا ښه
توپوهنه وکړه. دغو دوه لوبغاړو د ۷مې ویکټې لپاره د ۱۳۳ منډو ملګرتیا وکړه او نه
یوازې یې د سیالې ماهیپر لوبډلې پور ختم کړ، بلکې مخکېوالی یې هم ترلاسه کړ.
اعجاز احمدزي د خپلې
غوره توپوهنې په پایله کې سلیزه جوړه کړه او په ۱۱۰* منډو سره یې تر پایه خپله
ویکټ له لاسه ورنکړه. د نوموړي ترڅنګ عبدالله تره خېل ۶۹ او افتاب عالم ۲۰ منډې جوړې
کړې. د دغو لوبغاړو د غوره توپوهنې پرمټ میوند اتلان لوبډلې په خپله دویمه پاڼۍ کې
۲۲۳ منډې جوړې کړې او ماهیپر ستورو ته یې د ۹۶ منډو هدف وټاکه. د ماهیپر ستورو په
ګټه په توپ اچونه کې ابراهیم عبدالرحیمزي ۵، محب الله زرمتي ۳ او یمین خان احمدزي
یوه ویکټ ترلاسه کړه.
ماهیپر ستورو لوبډلې
یاد هدف د خپلو ۴ لوبغاړو په زیان سره ترلاسه کړ او په روانو سیالیو کې یې خپله
لومړۍ بریا د ۶ ویکټو په توپیر ترلاسه کړه. د ماهیپر ستورو په ګته په توپوهنه کې ناصر
جمال ۳۰، شاهدالله کمال ۲۲* او محب الله زرمتي ۱۵* منډې جوړې کړې. د میوند اتلانو
په ګټه نجات مسعود ۲، عبدالله تره خېل او عرب ګل مومند یوه-یوه ویکټ ترلاسه کړه.
د ماهیپر ستوري لوبډلې
تکړه ښي لاسي چټک توپ اچوونکي ابراهیم عبدالرحیمزي د دغې لوبې په دواړو پاڼیو کې ۹ ویکټې ترلاسه کړې او د خپلې لوبډلې په بریا کې یې مهم رول ولوباوه چې پرمټ
یې د لوبې د غوره لوبغاړي جایزه په خپل نوم کړه.
د یادو سیالیو په دوام
به د راتلونکې پنجشنبې په ورځ میوند اتلان لوبډله په ننګرهار ولایت کې د هندوکش
سټرایکرز لوبډلې پر وړاندې د سیالۍ ډګر ته ښکته شي، په داسې حال کې چې په خوست
ولایت کې به ماهیپر ستوري لوبډله د پامیر لیجینډز لوبډلې پر وړاندې د سیالۍ ډګر ته
ښکته شي.