د غازي امان الله خان کرکټ لوبغالي کې د لوبې
پچه سپین غر لوبډلې وګټله او لومړی یې د سیالې مس عینک لوبډلې پر وړاندې د توپوهنې
پرېکړه وکړه. سپین غر لوبډلې د ټولو لوبغاړو په زیان سره په ۴۸،۴ اورونو کې له
سیالې لوبډلې ۲۵۲ منډې ترلاسه کړې او د ۲۵۳ منډو هدف یې ورته وټاکه.
د
سپین غر لوبغاړو له ډلې لوبډلمشر درویش رسولي ۸۳ منډې، جلات خان موسی زي ۵۶ او
اکبر موسی زي ۳۸ منډې وکړې، په داسې حال کې چې د مس عینک لپاره په توپ اچونه کې
محمد ګل علیزي ۶ ویکټې، عبدالله تره خېل ۳ او نسیم معروف خېل یوه ویکټ ترلاسه کړه.
بلخوا د مس عینک لوبډلې د سیالې لوبډلې هدف
په ۴۳،۴ اورونو کې د ۶ ویکټو په زیان ترلاسه کړ او د نن ورځې بریا یې په خپل نوم
کړه. د یادې لوبډلې لپاره خالد تڼیوال ۱۰۳ منډې، لوبډلمشر شاهدالله کمال ۴۰ منډې
او ایمل شاهین ۳۷ ناسوځېدلې منډې وکړې. د سپین غر د توپ اچوونکو له ډلې ظاهر خان
پکتین ۲ او وفي الله تره خيل او یمین احمدزي یوه-یوه ویکټ ترلاسه کړه.
د یادونې وړ ده چې د نن ورځې د غوره لوبغاړي
جایزه د مس عینک لوبډلې محمدګل علیزي ته د ۶ ویکټو په ترلاسه کولو او د لوبې د
بدلوونکي لوبغاړي جایزه خالد تڼیوال ته چې ۱۳۰ منډې یې ترلاسه کړې وې؛ ورکړل شوې.
د یادونې وړ ده چې د نن ورځې دویمه لوبه د
ننګرهار پر نجیب الله تره کي کرکټ لوبغالي ترسره شوه چې پکې بست لوبډلې د دوو
ویکټو په توپیر سره سیالې بند امیر لوبډلې ته ماتې ورکړه.
د یادې لوبې پچه بند امیر لوبډلې وګټله او
لومړی یې د توپوهنې پرېکړه وکړه. د یادې لوبډلې لوبغاړو د ۶ ویکټو په زیان سره
سیالې لوبډلې ته د ۳۳۵ منډو هدف وټاکه چې له ډلې یې د توپوهنې په ډګر کې فرمان
الله ساپي ۹۲ ناسوځېدلې، محمداکرم ۵۱، جاوید احمدزي ۴۴ او مجیدعالم ۴۳ منډې ترلاسه
کړې.
هېره دې نه وي چې د توپ اچونې په ډګر کې بست
لوبډلې ته محمدالله لوګري ۲ ویکټې، نجات مسعود، خلیل ګربز، کریم جنت او عبدالله
احمدزي یوه-یوه ویکټ ترلاسه کړه.
خو سیالې بست لوبډلې دغه ستر هدف په ۴۹،۱
اورونو کې پوره کړ او د نن ورځې ستره بریا یې په خپل نوم کړه. د بست لپاره په
توپوهنه کې نجیب الله ځدراڼ ۱۵۹ ډېرې منډې او کریم جنت ۶۴ منډې وکړې چې په پای کې
یې خپله لوبډله تر بریا ورسوله.
د بند امیر لپاره په توپ اچونه کې سمیع الله
۴ ویکټې، فرمان الله ساپي ۲ او قمر شمس یوه ویکټ ترلاسه کړه، خو سیاله بست لوبډله
یې د بریا له ډګره راونه ګرځوله.
د دغې لوبې د غوره لوبغاړي جایزه نجیب الله
ځدراڼ او د لوبې د بدلوونکي لوبغاړي جایزه کریم جنت ته د ډېرو منډو د ترلاسه کولو
په بدل کې ورکړل شوه.
په پای کې باید وویل شي چې سبا به پر غازي
امان الله خان کرکټ لوبغالي د یادو سیالیو ۱۲مه لوبه دسپين غر او بست لوبډلو ترمنځ
په داسې حال کې چې په نجیب الله تره کي کرکټ لوبغالي کې ۱۳مه لوبه د مس عینک او
امو لوبډلو ترمنځ ترسره شي.