مس عینک اتلان لوبډلې د یوې غوره او هر اړخیزې لوبې پرمټ بند امیر ښامارانو ته د ۸ ویکټو په توپیر ماتې ورکړه او په یوولسم پړاو اي انډ شپږیزه کرکټ لیګ سوپرکولا سیالیو کې یې خپل سفر په بریا سره پیل کړ.
د لوبې پچه مس عینک اتلانو وګټله او لومړی یې
د توپ اچونې پرېکړه وکړه. دغې لوبډلې د
لوبې په لومړۍ پاڼۍ کې بهترینه توپ اچونه وکړه او سیاله لوبډله یې په ۱۱۴ منډو له ډګره بهر کړه. د بند امیر ښامارانو په ګټه عزیزالله میاخیل ۳۰ او فرمان الله ساپي ۲۰ منډې جوړې کړې. له بلې خوا د مس عینک
اتلانو په ګټه ضیاءالرحمن شریفي او مجیب الرحمن ۳-۳، نصرت الله
نورستاني او خلیل ګربز ۲-۲ ویکټې ترلاسه کړې.
مس عینک اتلانو د بند
امیر ښاماران لوبډلې د ۱۱۵ منډو هدف په اسانۍ سره د لوبې په لسم اور کې
یوازې د خپلو دوه لوبغاړو په زیان سره ترلاسه کړ او د ۸ ویکټو په توپیر
یې ستره بریا خپله کړه. د دغې لوبډلې په ګټه لوبډلمشر رحمن الله ګربز ۵۲ او خالد تڼیوال ۵۳* منډې جوړې کړې.
د مس عینک اتلانو تکړه
ښي لاسي چټک توپ اچوونکي ضیاءالرحمن شریفي د بند امیر ښامارانو پر وړاندې د روانې
لوبې په لومړۍ پاڼۍ کې بهترینه توپ اچونه وکړه او درې ویکټې یې ترلاسه کړې، چې
پرمټ یې د لوبې غوره لوبغاړی ونومول شو.
د دغو سیالیو په دوام
به سهار سپین غر پړانګان د بست ساتونکو او مس عینک اتلان د امو نهنګانو پر وړاندې
د سیالۍ ډګر ته ښکته شي.