د وزیر محمد اکبر خان لومړۍ درجه ولایتي سیالۍ چې د خوست او ننګرهار ولایتونو په کوربتوب د ۱۲ پیاوړو لوبډلو تر منځ پیل شوي وې، نن یې نیمه پایلوبې ترسره شوې. د یادو لوبو په لومړۍ نیمه پایلوبه کې د ننګرهار-ب لوبډلې د ډومیسټيک ایلېون-۲ لوبډلې ته د ۹ ویکټو په توپیر او دویمه نیمه پایلوبه کې ننګرهار لوبډلې د ډومیسټيک ایلېون لوبډلې ته د ۲۶ منډو په توپیر ماتې ورکړې.
د وزیر محمد اکبر خان لومړۍ درجه ولایتي
سیالیو پایلوبه به سبا سهار د ننګرهار په نجیب الله تره کي لوبغالي کې د ننګرهار
او ننګرهار-ب لوبډلو تر منځ ترسره شي.
لومړۍ نیمه پایلوبه چې د ننګرهار په غازي
امان الله خان لوبغالي کې ترسره شوه، ننګرهار-ب لوبډلې پکې د ډومیسټیک ایلېون-۲
لوبډلې ته ماتې ورکړه. دغه لوبه کې ډومیسټیک ایلېون لوبډلې لومړی توپوهنه ترسره
کړه او د ۱۱۲ منډو هدف یې وټاکه. د دوی په ګټه ضیاء الدین شریفي ۳۰، ظفر الوزي او
علي احمد ناصر هر یوه ۲۰ منډې جوړې کړې. د ننګرهار-ب لوبډلې توپ اچونه کې اکرام
مومند ۳، فهیم قاسمي، نصیر خان او اسرار شفق ۲-۲ ویکټې په خپل نوم کړې.
د ډومیسټیک ایلېون-۲ لوبډلې هدف ننګرهار-ب
لوبډلې د لوبې په ۱۶م اور کې د یوې ویکټې په تاوان ترلاسه کړی. د دوی په توپوهونکو
کې عنایت الله عرب ۵۳ ناسوځېدلي او جلات موسی زي ۴۰ منډې جوړې کړې. بلخوا د
ډومیسټیک ایلېون-۲ توپ اچونه کې جاوید سیدي ۱ ویکټ ترلاسه کړه.
د ننګرهار-ب لوبډلې توپوهونکی عنایت الله عرب
په ۵۳ ناسوځېدلو منډو جوړولو سره د لوبې غوره لوبغاړی ونومول شو.
د وزیر محمد اکبر خان لومړۍ درجه ولایتي
سیالیو دویمه نیمه پایلوبه چې د ننګرهار په نجیب الله تره کي لوبغالي کې ترسره
شوه، ننګرهار لوبډلې پکې ډومیسټیک ایلېون لوبډلې ته ماتې ورکړه.
دغه لوبه کې لومړی ننګرهار لوبډلې توپوهنه
وکړه او د ۱۸۷ منډو هدف یې وټاکه. د دوی په توپوهونکو کې محمد شهزاد ۹۱ ناسوځېدلي
او عثمان نوري ۷۶ منډې ترسره کړې. د ویلو ده چې د ډومیسټیک ایلېون توپ اچونه کې
صابر بهرامي ۱ ویکټ په خپل نوم کړه.
د ننګرهار لوبډلې د هدف ځواب کې ډومیسټیک
ایلېون لوبډلې د پوره ۲۰ اورونو په لوبولو سره ۱۶۰ منډې جوړې کړې. د یادې لوبډلې
په ګټه جاوید احمدزي ۴۵، نجیب الله الکوزي ۳۹ او اسلام ځاځي ۲۷ منډې ترسره کړې. د
ننګرهار لوبډلې توپ اچوونکو کې ظاهر شېرزاد ۲ لوبغاړي د لوبې له ډګره بهر کړل.
د لوبې په وروستیو کې د ننګرهار لوبډلې پیلیز
توپوهونکی محمد شهزاد د ۹۱ ناسوځېدلو منډو په جوړولو سره د لوبې غوره لوبغاړی شو.
د یادونې وړ ده، چې د وزیر محمد اکبر خان
لومړۍ درجه ولایتي سیالیو پایلوبه به سبا سهار د ننګرهار په نجیب الله تره کي
لوبغالي کې د ننګرهار او ننګرهار-ب لوبډلو تر منځ ترسره شي.