د افغانستان کرکټ بورډ د کورني کرکټ څانګې له کلني پلان سره سم د زونونو په کچه نهم پړاو اي انډ جام - لېست اې یو ورځنۍ سیالۍ پیلېږي. د مهالوېش له مخې به دغه سیالۍ د روان ۲۰۲۶ز کال د مې میاشتې په ۱۷مه نېټه پیل شي او د راتلونکې جون میاشتې تر څلورمې نېټې پورې به د ننګرهار ولایت پر غازي امان الله خان او نجیب الله تره کي کرکټ لوبغالو دوام ومومي.
هېره دې نه وي چې د یادو سیالیو لومړۍ برخه به یې د روانې مې میاشتې په
۱۷مه نېټه د غازي امان الله خان پر کرکټ لوبغالي پیل شي چې د لوی اختر له تېرېدو
وروسته به یې دویمه برخه بیا پر غازي امان الله خان او نجیب الله تره کي کرکټ
لوبغالو ترسره شي چې د جون په ۴مه نېټه به پای ته ورسیږي.
باید وویل شي چې په یادو سیالیو کې د هېواد د ۵ زونونو اړوند
لوبډلې (بند امیر، مس عینک، بست، امو او سپین غر) ګډون لري چې په لومړۍ لوبه کې به
یې بند امیر لوبډله د مې میاشتې په ۱۷مه نېټه د مس عینک لوبډلې پر وړاندې د سیالۍ ډګر
ته ښکته شي.
د دغو سیالیو د مهالوېش له مخې به ټولې ګډون کوونکې لوبډلې د یو بل پر
وړاندې ۶ لوبې ترسره کړي چې له منځه به یې دوه مخکښې لوبډلې د جون میاشتې په څلورمه
نېټه کېدونکې پایلوبې ته لاره ومومي.
په نهم پړاو اي انډ جام لېست اې یو ورځنیو سوپرکولا سیالیو کې به د ملي لوبډلې
د ګڼ شمېر لوبغاړو ترڅنګ د کورني کرکټ یو شمېر مخکښ او د غوره کارکردګۍ لرونکي
لوبغاړي هم لوبه وکړي.
د یادونې وړ ده چې د نهم پړاو لېست اې سیالیو د عمومي مالي ملاتړي حقوق اي
انډ مخابراتي شرکت، په داسې حال کې چې د مرستیال مالي ملاتړي حقوق سوپرکولا د څښاک
ملي شرکت ترلاسه کړي دي.
دغه سیالۍ د افغانستان کرکټ بورډ د کورني کرکټ په جوړښت کې له خورا ستر ارزښته
برخمنې دي چې په هېواد کې د لوبغاړو او لوبې د ودې په برخه کې ستر رول لوبوي.
په پای کې باید وویل شي چې دغه سیالۍ د امید وطن د روانو ملي شل اوریزو
سیالیو څخه درې ورځې وروسته په ننګرهار کې پلیږي چې پایلوبه به یې د روانې مې
میاشتې په ۱۴مه نېټه ترسره شي.
د سیالیو بشپړ جدول او مهالوېش په لاندې ډول دی: