وزیر محمد اکبر خان دویمه درجه ولایتي سیالۍ د نومبر میاشتې په ۲۵مه نېټه پیلېږي
کورني
7 دقیقې

وزیر محمد اکبر خان دویمه درجه ولایتي سیالۍ د نومبر میاشتې په ۲۵مه نېټه پیلېږي

د افغانستان کرکټ بورډ د کورني کرکټ څانګې د کلني مهالوېش له مخې د وزیر محمد اکبر خان دویمه درجه ولایتي سیالیو اتلسم پړاو د روانې نومبر میاشتې په ۲۵مه نېټه پیلېږي او د راتلونکې ډسمبر میاشتې تر ۱۴مې نېټې پورې به د کندهار، خوست او ننګرهار ولایتونو په شپږو بېلابېلو کرکټ لوبغالو کې ترسره شي.

7 دقیقې

د افغانستان کرکټ بورډ د کورني کرکټ څانګې د کلني مهالوېش له مخې د وزیر محمد اکبر خان دویمه درجه ولایتي سیالیو اتلسم پړاو د روانې نومبر میاشتې په ۲۵مه نېټه پیلېږي او د راتلونکې ډسمبر میاشتې تر ۱۴مې نېټې پورې به د کندهار، خوست او ننګرهار ولایتونو په شپږو بېلابېلو کرکټ لوبغالو کې ترسره شي.

دغه سیالۍ چې په پنځوس اوریزه بڼه ترسره کېږي، د هېواد د بېلابېلو ولایتونو ۴۰ لوبډلې پکې ګډون لري چې په اتو ګروپونو وېشل شوې دي. هره لوبډله به د ګروپي پړاو په ترڅ کې څلور لوبې ترسره کړي او د هر ګروپ مخکښه لوبډله به د وزیر محمد اکبر خان لومړۍ درجه ولایتي سیالیو ته لاره ومومي.

د افغانستان کرکټ بورډ د کورني کرکټ مسوول، ښاغلي نظیم جار عبدالرحیمزي، د دغو سیالیو په اړه وویل: ((موږ د تل په څېر هڅه کړې چې کورنی کرکټ لا پیاوړی، پراخ او پرمختللی کړو. د سږ کال د دویمې درجې ولایتي سیالۍ چې ۴۰ لوبډلو ته پکې د ګډون زمینه برابره شوې، د دې هڅو یوه ښه بېلګه ده.))

د نوموړي په وینا، د سیالیو له اتو ګروپونو څخه به یوه-یوه مخکښه لوبډله د راتلونکو لومړۍ درجې ولایتي سیالیو لپاره لار ومومي. دغه راز به د اتو مخکښو لوبډلو ترڅنګ څلور نورې لوبډلې هم دغو سیالیو ته ورزیاتې شي چې د فرسټ کلاس سیالیو او نورو کورنیو سیالیو د مخکینیو کارکردګیو پر بنسټ به ورته لوبغاړي ټاکل کېږي.

د وزیر محمد اکبر خان دویمه درجه ولایتي سیالیو د ګډونوالو لوبډلو د ټاکلو بهیر هم د کلبونو په کچه له ترسره شویو ولایتي سیالیو سره تړلی دی. په دې سیالیو کې د هېواد له بېلابېلو ولایتونو څخه هغه لوبغاړي چې د پام وړ وړتیا او کارکردګي یې ښودلې، د دویمې درجې ولایتي سیالیو ته د لار موندلو فرصت ترلاسه کوي.

د دې سیالیو غوره او ځلېدونکي لوبغاړي به د وزیر محمد اکبر خان لومړۍ درجې ولایتي سیالیو ته لاره ومومي، چې ټاکل شوې  ده د دویمه درجه ولایتي سیالیو په پای کې د هېواد په بېلابېلو ولایتونو کې ترسره شي.

د یادونې وړ ده چې د دغو سیالیو له پیل وړاندې له هغو لوبغاړو څخه چې د کلبونو په کچه یې په ولایتي سیالیو کې د پام وړ وړتیا او کارکردګي ښودلې وه، په بېلابېلو ولایتونو کې د یو-یو پړاو فزیکي ازموینې هم واخیستل شوې، چې په پایله کې یې بریالي لوبغاړي د دویمې درجې ولایتي سیالیو لپاره غوره شول.

 

ملاتړ کوونکي او همکاران